周汶錡昨日出席護膚品牌活動時，對於Rosemary涉嫌藏毒及撞車不顧而去一事，坦言作為朋友定必支持她：「我哋識咗好耐，希望佢冇事，依家唔會打電話畀佢住，因為唔想騷擾佢，希望件事盡快解決。（有冇見過佢有咩不良嗜好？）冇，其實佢個人嘅事唔係好清楚，應該畀啲空間佢，每個人都有私生活。（佢唔潔身自愛？）唔會作出批評，我哋係朋友亦係工作上夥伴，我會支持佢，總之呢件事冇人想發生，亦希望唔好影響佢工作。」

李嘉慧（左起）、樂基兒及Rosemary經常一同工作及出騷。

周汶錡獲小孩獻吻，表情趣怪。

性格似小朋友

已為人母的李嘉慧表示與Rosemary因工作認識，覺得她性格似小朋友，至於是否因為壓力而鑄成大錯？她說：「有咩壓力？模特兒工作係被動，就算你主動都未必接到Job。其實佢咁細個拍拖，可能都會遇到唔好人，又或者誤交損友。總之我希望佢冇事，做父母當然會傷心，如果我個女遇到咁，我都傷心。」

至於名模琦琦則讚Rosemary是有禮貌、又乖又純品的女孩，希望她度過艱難時刻，照顧自己，她說：「人生路上，有時會做啲傻嘢、唔理智同幼稚嘢，但係吸毒一定唔可以，啲初入行嘅模特兒新人會視你哋為偶像，所以要小心言行，一旦做錯嘢，要誠實勇敢面對。」