即將踏入28歲的混血名模Rosemary（Rosemary Vandenbroucke），星期日在美國參加內華達州黑岩沙漠舉行的「Burning Man Festival」期間，被警方搜出搖頭丸被捕。翌日她駕駛出租車撞倒街邊消防水龍頭和鎮內拱門地標後不顧而去，被市民揭發報警又再被捕。兩宗案件分別以15,000美元和1,280美元保釋外出，於下月19日和本月29日在美國的法院提堂。

搬返渣甸山寓所

雖然Rosemary與母親Julie媽，母女倆經常傳嗌交鬧不和，但始終血濃於水，事發後Julie媽立即頻撲搵人救女。雖然Rosemary與男友施展調虎離山計，訛稱表示下星期二才返港，但其實她們由好友時裝設計師鄧達智安排，前晚已秘密返港。而Julie媽昨日亦透過SMS記者稱：「她已平安回港！」

Rosemary被捕後嘗盡人情冷暖，消息傳出後曾與她情同姊妹的名模Ana R.立即劃清界線，更冷嘲熱諷指模界吸毒已非新聞，不過設計師好友何國鉦支持不換模，下周開騷預埋Rosemary。

而另一設計師好友鄧達智更幫忙安排回港，昨日鄧達智接受訪問時說：「其實佢喺9號晚已返港。（住堅道宿舍？抑或跟媽咪住渣甸山？）其實佢已經搬返去同Julie媽住咗一年。」不過，另一友人透露Julie媽向外表示Rosemary搬到友人家暫住。

說話內容要審批

據悉Rosemary原定今天舉行記者會，但鄧達智表示記者會要改期：「趕唔切，因為佢有案在身，喺美國請咗律師處理，如果佢要喺香港搞記者會，講乜都必須先由美國律師同意指示，但因為周末，趕唔切做嘢，所以明（今）日開記者會，不過佢星期一要試衫，預咗見記者時有簡單回應。」他又透露：「我知Rosemary已經搵咗一間Dog Rescue嘅慈善機構幫佢與傳媒聯絡，因為之前雙方合作過，但我唔知點同呢間公司聯絡。」

另外，昨晚鄧達智接受TVB《東張西望》訪問時透露，Rosemary已返港，並與他通電話詢問意見：「我同Rosemary通過幾次電話，討論過好多話題，佢有問我請邊間公關公司搞記者會好呢？我亦同Julie媽通過電話，佢好激動咁喊，非常擔心。」節目中亦播出06年Rosemary的訪問片段，當時更大讚媽咪。

至於01年曾與Rosemary傳緋聞的台灣音樂才子王力宏，昨日所屬的唱片公司則表示：「沒有甚麼回應！」