嘉欣與廣告導演袁劍偉喜事成雙，圈內朋友紛紛道賀！與嘉欣私交甚篤的林珊珊，原來早於前晚已收到袁劍偉電話，並告知雙喜臨門的消息：「佢老公打畀我，叫我唔使擔心，佢話佢哋結咗婚同埋有BB！我好開心，即刻同鄭伊健講，叫佢去日本旅行時物色結婚禮物，而BB份禮物就打算同伊健夾錢開基金畀佢！（去加拿大搵嘉欣？）太遠喇！一人讓一步，叫佢去日本度蜜月會合，我同伊健依家都摸住酒杯底為佢慶祝！」她坦言早前曾搵對方合作：「佢話要飛去遊學，學織布同紮染！」
至於嘉欣的「師傅」詹瑞文，則表示戥她開心：「佢一直都想有小朋友！」又讚她是一個有理想、勇敢及堅決的女生。問到若婚後不做戲，會否覺得浪費？他說：「唔會！結婚之後係另一階段，對演戲仲有幫助！（同嘉欣個小朋友上契？）呢啲遲啲，等我打電話畀佢先！」而一向痛錫嘉欣的潘迪華則說：「你哋知道咪好囉！應該恭喜佢、祝福佢健康開心！希望大家報道啲健康消息！袁生係個非常非常理想嘅丈夫，好好人！（你知道佢哋結婚？）總之你哋錫佢多啲啦！」而劉心悠及星皓方面則表示不作回應。