多番在電影頒獎禮獲提名及獎項的林嘉欣，一向低調處理感情事，她只愛鑽研演技，而其健康及甜美的外形亦令她成為廣告界寵兒！正當不少電影人睇好其演藝事業更上層樓之際，不過她竟於今年3月中出席活動後，突然消失娛樂圈！近來突傳她為一段苦戀而離港逃情，傳言更因近期她缺席其主演電影宣傳活動，而一發不可收拾！
被目擊加國做婦檢
外界盛傳嘉欣兩年前在舊愛陳光榮介紹下，認識已婚廣告導演袁劍偉（Steve），可惜袁劍偉已有妻室，不過這段苦戀仍禁不住發生！有指為逃避當第三者角色，嘉欣只好逃情加國，只是未幾又再傳她要退出娛樂圈結婚！日前內地更有消息稱有人目睹嘉欣於加拿大多倫多的聖瑪麗綜合醫院出現，接受孕婦定期檢查，加上她未有站出來澄清，令未婚懷孕之說更傳得沸沸揚揚！直到昨日，身為苦戀男主角的袁劍偉接受本報記者訪問時，終於開腔交代一切，親口剖白與嘉欣的感情事！
袁：袁劍偉 記：記者
記：林嘉欣最近被傳未婚懷孕退出娛樂圈，又傳你太太唔想再提林嘉欣個名，亦有傳你因為林嘉欣而離婚，搞到傳言滿天飛！究竟件事係點呢？
袁：我覺得需要交代一啲嘢！其實我覺得有啲報道唔啱，尤其寫我前妻，我已經離婚一段時間！我前妻性格好平和，絕對唔係雜誌所講咁嘅人，呢樣係我最想講，因為啲報道對佢好唔公平，實情唔係咁樣！林嘉欣亦唔係第三者，我同佢已經結咗婚，一切係Step By Step，我同嘉欣係喺正常程序下發生，我同太太離婚後同嘉欣拍拖嘅！
記：有傳嘉欣同你住同一棟大廈，為咗接近你？
袁：冇咁嘅事！咁誇張？我同嘉欣都好低調，我哋一直冇諗過要隱瞞任何嘢，只係想低調，因為屋企有喜事！
記：幾時結婚？
袁：係今年嘅事，有行禮，係喺加拿大，唔鋪張嘅！只係同啲屋企人同好好嘅朋友食飯，冇圈中人參與！
記：嘉欣生BB後會唔會復出？
袁：睇佢意願啦！（唔想嘉欣湊BB？）當然希望啦！
未知腹中肉性別
記：嘉欣佗住仔定女？
袁：唔知！（驚BB小器？）唔識呢啲嘢！（鍾意仔定女？）哈哈！唔好「Chok」我啦！
記：BB係咪11月出世呀？
袁：唔講咁多啦！（喺加拿大生？）係！
記：點解你人在香港，唔返加拿大陪嘉欣待產？
袁：香港有好多嘢做，佢屋企都好多人照顧佢！
記者最後託他問候嘉欣，他表示太太與BB近況好好，多謝大家關心。