工作能賦予Karen無限力量，入行十多年，對唱歌的熱誠從未減退，她坦言工作是她人生的推動力：「我仲好後生，嗰團火仲好旺盛，我到依家依然好享受喺舞台上演出，真係覺得好玩，好似上癮搣唔甩，冇任何嘢可以令我放棄。」

Karen在唱歌事業上獲得很大滿足，近年她更積極參與幕後製作，演出過舞台劇的她，下一個目標是嘗試製作舞台劇，她希望製作一個開心的歌舞劇：「苦澀情歌唱得多，作為藝人某程度係娛樂大家，我希望帶畀大家歡樂。」

對被人冠以「剩女」稱號，Karen並未介意：「冇乜嘢，唔覺得係踩、有貶嘅意思，你估咁易做o架，我識得欣賞同珍惜！」Karen指出「剩女」是社會現象，她笑說：「有好多自己友，其實剩女好叻，代表你有一定條件、成就，可能令到有啲男人唔敢追，但冇理由為咗咁而去降低水平。」

感情隨緣

目前單身的Karen對感情抱隨緣態度，她覺得兩人相愛並非以一張結婚證書來證明，她說：「最緊要開心，結唔結婚唔重要，就算有啲人嫁咗，如果個老公唔好，咁又點呢？」對另一半，Karen着重彼此溝通，她說：「最緊要係啱Channel，現階段我唔再係陶醉你買啲乜氹我，情趣係需要，但大家溝通唔到就冇用。」Karen不排除當遇上真命天子，她會有結婚衝動，她笑說：「要發生咗我先知，絕對要睇緣分。」