陳奕迅昨日以代言人身份到廣州出席《曼秀雷敦潤唇膏發布會》，現場播放三條廣告片，Eason與女主角3歲小女孩手拖手出場，他搽完潤唇膏後即錫了女孩一啖。

小女孩獻吻，Eason冧爆。

Eason表情動作多多搞氣氛，認真識撈。

今次Eason在廣告中咀小女孩，而他的銀幕初吻則於電影《12夜》奉獻給張栢芝，Eason不避嫌狂讚栢芝有對電眼：「佢好靚，靚到我唔敢望佢對眼，只係望住佢耳仔，好緊張。」Eason入行後咀女無數，艷福不淺，現實中他亦經驗老到，12歲已失初吻，他說：「嗰時喺英國讀書，感覺幾舒服，不過我哋冇發展。」

人細鬼大的Eason，12歲已被女追，他說：「有德國女仔上堂時傳紙仔畀我，寫住：『Would you go out with me？』當時自己英文差，唔明去邊，個女仔乳名Bubble，我喺群眾壓力下Say Yes，佢彈起身嗌Yeah：『I'm going out with Eason.』我先知道Go Out解拍拖，好快拒絕咗！」Eason自言是中國仔，還扮後悔說：「後來個女仔做咗Model，仲愈大愈靚，依家講番都唔開心。」

狂讚老婆索到極限

然而，已為人夫的他為免老婆徐濠縈打爛醋埕，最後不忘冧老婆大人：「不過依家嗰個索到極限，極索！（有冇錫？）有，刷完牙咪有。」至於阿徐表示不再送女兒返學免引起混亂，Eason亦婦唱夫隨大表贊同。