日前Rosemary與Gordon於01年10月撻着，當年兩人愛得癡纏，試過離離合合，又曾以「兄妹」相稱，可惜戀情最終未能開花結果，反而分手後再見不是朋友，並隔空爆發罵戰，互相數臭！Gordon曾指罵Rosemary貪心自私，又曾踢爆她與新男友分手收場，Rosemary得悉後狠批Gordon缺口德！另外，Gordon更與Rosemary的男友Christopher在夜店起衝突！

Rosemary當年行騷突然喪喊，令人嘖嘖稱奇，連Gordon都質疑原因！(資料圖片)

Gordon與Rosemary曾愛得癡纏，在大庭廣眾「做騷」。 (資料圖片)

「吸食都唔喺你面前」

如今舊愛惹麻煩，Gordon昨日接受訪問時，問到知否Rosemary在美國涉嫌藏毒被捕？他反應甚大地說：「係咩？我真係唔知！」他表示分手後已經沒有與對方聯絡，只是間中在夜店相遇：「我禮貌上都會Say Hi，我哋只係好普通嘅朋友！」問到對方有沒有吸毒習慣？Gordon說：「我唔知，好難Comment！呢個世界好多引誘，可能有損友引誘佢吸食，話可以減壓或者情緒高漲之類嘅說話，就算吸食都唔需要喺你面前！」

代舊愛向大眾求情

Gordon又大爆Rosemary一次行騷的離奇事件，他說：「你記唔記得佢有次行騷突然喊到失控？我唔知會唔會有關係！（打電話畀佢？）唔會！我哋真係冇聯絡，不過我都希望大家畀次機會佢，每個人都會犯錯，應該畀次機會！」據本報翻查資料，Gordon所指Rosemary行騷失控，相信與02年2月一次行騷有關，當時Rosemary為《鄧達智2002春夏時裝展》行騷，突然爆喊淚灑天橋，又攬實鄧達智起勢狂哭，當時疑與Gordon感情出現問題搞到吵大鑊！