狄易達跳得唱得，小小So一直對呢位年輕人都好欣賞，近排就聽到達仔有首新歌叫《可多不可少》，仲係唱作人方大同為佢度身訂造。
小小So： 估唔到原來你同大同咁老友？
達 仔： 其實唔熟！係有次大同聽到我同事話我仲差一首歌，大同就好好咁話幫手，跟住就好快作咗首歌畀我。
小小So： 大同對你咁好，你有冇主動請客答謝佢？
達 仔： 仲未有時間正正經經請佢食餐飯，但佢係素食者，記得上次同佢去食出名嘅厚式漢堡包，我就大大啖食漢堡，佢就食個「走漢堡」得啲生菜同番茄嘅漢堡包，但見佢都食得好滋味，所以下次請佢食飯要花吓心思，搵間素菜館先得。
達仔仲話首歌錄咗一年，小小So聽到嚇一跳，心諗唔通達仔嘅歌藝真係Handle唔到？佢話原來上年錄完後出現其他問題，隻碟停咗唔做住，今年再做番時咪再錄過囉！