說得一口流利英語的廖碧兒（Bernice）去年向無綫請假，全心全意投入由陳嘉上執導的荷里活新片《The King of Fighters》（《拳皇》）的拍攝，望與同聲同氣的Maggie Q攜手打入荷里活，以首位無綫當家花旦之名走向國際。有傳Bernice因此而推Job，損失共七位數字的廣告酬金！

《拳》片是改編自同名日本著名格鬥Game，加上陳嘉上大膽起用一班性感華裔女星演出，未上映前已被外界看好。不過，該片自去年11月煞科後一直「只聞樓梯響」，上畫一直遙遙無期。據美國電影資料網imdb顯示，影片去年11月曾在美國電影市場賣片，美國上映日期亦定為今年，但如今已踏入年底，影片在美國上映仍冇聲冇氣！

新加坡已上映

可是，本報記者昨日在網上購物網阿馬遜發現，未正式上映的《拳》片已於上月31日推出DVD及藍光碟，更慘的是網上出現BT任人下載的情況，變相只要上網的話，便可以安坐家中非法任睇，即使該片未來可在美國上畫，勢必大大影響影片叫座力！雖然北美上映隨時觸礁，但據知新加坡、馬來西亞及日本的片商已買下版權，新加坡更有戲院上映《拳》片。

記者昨日致電Bernice，對於新片於北美上畫隨時胎死腹中，她說：「以我所知美國仲未正式出DVD，但好多地方都有盜版。其實上個月26號已經喺新加坡上咗畫，美國方面都有問過我去唔去做宣傳，但因為拍劇所以去唔到，惟有拍段短片支持，我聽講話美國好似喺10月上！」不過，Bernice坦言仍未收到任何正式上映的通知，問到若真的上映無期會否感可惜？她說：「可惜係因為有盜版，作為演員唔可以控制上唔上映，只可以控制演好角色！」而Maggie Q有份主演的另一部動作片《Operation：Endgame》亦與《拳》片同一命運，未有安排上畫便直接推出DVD。