書展期間，o靚模爭相推出寫真集，令不少真心出書嘅明星、藝人都要行埋一邊，有時小小So都戥呢班人唔抵，明明辛辛苦苦寫幾萬字，點知最終輸畀條「事業線」，不過DJ瑪姬就好鬼阿Q精神，仲對自己本書信心十足。
小小So：點呀？你今年出小說喎！
瑪 姬：係呀！希望你多多支持啦！
小小So：話晒你被稱為電台界最靚女DJ，本書嘅封面有冇事業線先？
瑪 姬：冇呀！我好努力扯都扯唔到條事業線出嚟呀！哈哈，留番畀其他人露啦！
小小So：咁渣呀？點夠班o靚模鬥呀？
瑪 姬：冇辦法啦！可能就係咁，貿發局可憐我，畀我搞簽名會。
小小So：你都應該出番本寫真集啦！DJ嫩模喎，有噱頭！
瑪 姬：咪玩我啦小小So，我怕嚇走晒啲人，連本身僅有嘅聽眾Fans都嚇走埋。
小小So：咁你係咪轉行做才女呀？
瑪 姬：唔算，不過上年寫完大家反應幾好，今年咪再出書寫吓嘢，同大家分享吓愛情經歷囉！