英皇電影《綫人》上映11日迅即錄得約940萬元票房，成績驕人，昨晚更筵開十席慶功。英皇老闆楊受成對於被指與成龍早前援助四川地震的捐款數目不符，他說：「2008年5月12日發生地震，13日我已經親手將一千萬元支票交畀民政部副部長，有相為證，近日嘅有關報道唔正確，但係成龍有冇再捐500萬就唔清楚，我識成龍咁多年，佢數目好均真，唔會拖泥帶水。」

楊受成與張家輝（背鏡頭者）甫見面即攬實打招呼。

智叔好戲眾所周知，今次於《綫人》的演出亦格外突出！

榮辱與共撐成龍

問楊受成可會採取法律行動？他說：「報道嚟自網上，好難追究，清者自清，慈善事業都會繼續做。（日後捐款睇實啲？）做善事出心，刻意抹黑好難防，我都有打畀成龍，佢知呢件事，佢唔會言而無信。（成龍唔返香港係避風頭？）避咩？佢依家喺上海拍戲，又做導演、又做演員好大壓力，佢上星期都返過嚟整牙。」

至於成龍的「菲警」言論風波？楊受成說：「我有同佢傾過，成龍係有講過菲政府有處理不當嘅地方，又有講過特蠢部隊，但係助手冇寫出嚟，佢份人係詞不達意，我同成龍榮辱與共幾十年老友，佢係心直口快，處理得唔妥善。」至於容祖兒被指是「歌星仔」，他說：「祖兒唔想聽、唔想理呢件事。」

票房勁到笑住瞓

《綫人》男主角張家輝對票房很滿意，更將目標推高至1,700萬元：「依家每日都等導演有關票房嘅短訊先肯瞓，星期日仲係笑住瞓，嗰日票房有80萬，比開畫日仲多，如果收到1,700萬着穿窿褲都冇問題。（謝霆鋒都着？）我肯佢都應該肯。（有信心再攞獎？）現階段擔心票房多啲。（再開戲乘勝追擊？）唔想交行貨。」而他在新片《建黨偉業》中飾演梁啟超，近日再有新劇照曝光。同場的鍾舒漫對於今次戲份不及《証人》並不介意：「部戲好就得！」