剛度過39歲生日的袁詠儀（靚靚）雖已育有四歲兒子張慕童，但她恨女恨到出晒面，人前人後均表示擁有一仔一女才是人生一大樂事，更直言今年生日願望是生多個BB。據知，靚靚為再度懷孕，不但全面停工積極閉關造人，還進食不同種類補品調理身體，希望早日迎接新生命來臨。眼見愛妻為造人一事大費周章，張智霖（Chilam）亦不敢怠慢，努力工作搵奶粉錢之餘更細屋搬大屋，兩人最近被發現原來已由月租六萬多、位於大潭的逾千七呎曼克頓花園舊居，秘密搬至月租逾十五萬、位於淺水灣的近三千呎福慧大廈豪宅，準備為一家人提供又大又舒適的安樂窩。

新居福慧大廈面積：約2,857呎市值：中層單位逾7千萬元月租：逾15萬元樓齡：28年

舊居曼克頓花園面積：約1,776呎月租：逾6萬元樓齡：24年

低密度又夠靜

其實本報記者早前曾目擊Chilam夫婦與沈嘉偉等好友，齊齊到元朗葡萄園及上水雙魚河天巒參觀，據知他月前才扑錘租住該淺水灣豪宅。現場所見，該處四周環境清幽，只得十多層屬低密度住宅，符合兩夫婦的要求。連日來記者在其新居守候，均見Chilam在該大廈出入。

袁詠儀的代步七人車已停泊在新居屋苑的停車場。

張智霖與袁詠儀搬進淺水灣新居，面積比舊居大接近一倍。資料圖片

與老婆遊車河

直至前日，Chilam駕駛其逾百萬平治C63跑車與老婆遊車河，駛至附近油站入油時，記者上前追問是否為了迎接新生命才搬屋，但Chilam只推說以前住大潭太遠：「呢度近啲方便啲，同埋嗰邊啲路窄啲，危險啲，我手車唔好嘛！（你手車唔好？）我都冇郭富城咁好。」