本文重點
在香港長大、揚威國際的大導演吳宇森，在威尼斯時間星期五晚獲頒「終身成就獎」，他在威尼斯電影節主席Marco Muller、評委主席鬼才導演昆頓塔倫天奴與老友徐克手上接過獎項後，熱淚盈眶地說：「我愛中國電影，我要將獎項獻畀啟蒙老師張徹，佢令我獲益良多。
當我知自己得獎時感覺好愕然，但喺徐克手上第二次領獎又別具意義！我慶幸生於香港，有好多學習機會，我唔會忘記過往嘅奮鬥時刻同香港嘅奮鬥精神，好多謝合作過嘅電影人，我希望未來嘅中國、香港電影會拍得更好。」他還特別感謝徐克：「佢喺我最低潮時幫助我、鼓勵我拍《英雄本色》，改變咗我嘅一生！」
首映掌聲雷動
吳宇森不忘感激家人支持，並公開向太太示愛：「多謝My Love，佢34年來喺我身邊無條件鼓勵我，但只換來Loneliness（孤獨），但我唔會因此停低，往後我會繼續去內地拍戲，我仲要多謝我嘅Lovely Children！」當他領獎時，全場起立拍掌近5分鐘，而他監製的《劍雨》首映散場後，觀眾又拍掌5分鐘以示欣賞。不過，首映一度發生小插曲，開場前有示威人士欲抬棺材闖入會場，令首映押後半小時開始。其後，吳宇森出席香港之夜派對，接受楊紫瓊、張曼玉及余文樂等香港影星及電影人恭賀。
