搏殺篇：一動一靜
人稱「玉女掌門人」的Vivian，獲上天特別眷顧，即將踏入43歲，卻沒被歲月偷走半點青春。已有13年沒有拍戲的她，去年接拍許鞍華（Ann）執導的電影《得閒炒飯》，除與吳君如發展一段雙性戀外，又要跟影壇新貴William演床上戲。要說服玉女重出江湖已甚有難度，還要演繹如此偏鋒的題材，相信難上加難。這天，Vivian剖白出山經過，同時與後輩William分享愛情世界。
V：Vivian W：William 記：記者
記：13年冇演戲，咩原因令你接呢部戲？
V：其實一路都有電影、電視劇甚至舞台劇搵我合作，奈何角色或劇本都唔係咁適合，所以一動不如一靜。原本呢個時間，我冇諗過拍戲，因為我已經唔係以前嘅搏殺期，亦唔係全職藝人，所以對演藝工作唔會主動爭取。直至Ann呢個咁特別嘅劇本，真係想挑戰吓，因為我嘅角色比較新鮮，相信觀眾會有幻想，最重要係我好欣賞Ann，覺得佢係一個遙不可及嘅人物，好想同佢合作。
W：我就掉番轉，一靜不如一動，因為依家算係我嘅搏殺期，初頭我乜都唔知，淨係知要見許導演，心情好緊張，當知道對手係周慧敏就仲緊張。我仲記得Casting完之後嗰一個禮拜，我每日追問經理人有冇回覆，因為Vivian係我年少時嘅偶像，以前都有將佢嘅閃卡放喺銀包，所以好期待同佢合作。
床戲先交代
記：你對William嘅感覺？
V：初時都擔心大家有隔膜，始終係兩個唔同年代嘅演員，記得第一次見面試咗兩場戲，雖然佢有少少怕醜，但我要特別讚呢位新人，佢做事好有要求同動力，我哋拍咗一場床戲，要由佢做主導 ，如果我係佢都會有壓力。
記：拍床上戲前有冇同家人傾過？
W：所有親戚都話我執到，所以我懷住好興奮嘅心情做。
V：我最要交代嘅係另一半，我有問佢，其實唔只同William嗰場，就算其他劇本上嘅嘢，都有問佢需唔需要知，但阿Joe（倪震）話：『唔使喇！你覺得OK就做好佢啦！』我嘅伴侶畀我最大嘅Support，佢信任同尊重我嘅決定，令我可以好投入、好有力量去演呢個角色，所以要特別多謝佢。
生活篇：重視私隱
Vivian出山拍戲，但強調並非為將來復出影壇鋪路，原來她最怕行紅地氈，因為每次都要為揀衫煩惱。
記：戲中你會網上交友，現實中會唔會？
V：我好少上網識人，冇微博亦冇Facebook，最多喺MSN Add十幾個朋友傾偈，但我唔係成日開，因為好怕成日都要講嘢。上網我會睇News同資訊，或者睇吓Fans嘅留言，但微博嗰啲呢……我始終想有多啲私隱，唔想喺呢個地盤不斷Update新嘢，想保持一啲空間，但好多人以為我開咗，因為有假嘅。
遠離負能量
W：我會追潮流，想跟近啲社會興啲乜，不過我都好佩服Vivian，點可以Keep得咁後生。
V：我覺得心態最緊要，當然保養都要。我會遠離負能量，同多啲正能量嘅人互動，因為我係基督徒，平時希望多啲靈性生活，例如去一啲同靈性有關嘅活動，或者同教友多啲聚會，研究吓聖經。依家個社會好複雜，價值觀完全唔同，起碼調節番自己，令自己嘅信念明確同堅定啲，呢樣對外表都會有影響。
愛情篇：感覺主導
男女愛情觀點或多或少有不同，對Vivian來說，愛是需要互相包容及尊重，她與倪震走過半生，08年曾爆出第三者危機，令向來不嚮往婚姻生活的她峰迴路轉地答應下嫁，她坦言這兩年婚姻生活令她心態有改變。至於William與女友Angelababy分手後，感情處於真空期，但他未有灰心，對下一段戀愛充滿期待。
記：婚後嘅生活有冇變化？
V：老實講，以前我以為結咗婚都唔會改變，畢竟大家咁多年，依家先發覺原來真係有㗎！我個人穩重咗同溫柔咗。
W：你畀大家嘅印象一向都好溫柔。
V：其實係錯覺，因為我自小受家庭影響，細個媽咪要做嘢，所以好多決定都係自己揀，例如搵學校、選科甚至出唔出嚟社會做事，變咗個人男仔啲，係一個幾倔強嘅女性，少咗女性應有嘅溫柔。自從結婚後，我喺呢方面增長咗，依家唔會只諗自己，而係同另一半合成一個個體，呢種感覺係一個幾微妙嘅變化。
記：有冇諗過生小朋友？
V：都係計劃唔諗住有小朋友，如無意外，如果唔係天意要我意外有，應該唔會改變。
W：我就覺得愈快愈好，因為我好鍾意小朋友，趁仲年輕有活力，想同BB多啲一齊，但暫時未搵到一個好嘅對象，而且想事業穩定同鞏固咗先諗呢樣嘢。
年齡不重要
記：你覺得依家社會嘅愛情價值觀有冇轉變？
V：我覺得因人而異，社會轉變當然好大，無論愛情、工作嘅追求甚至心靈上，都同以前唔同，要取捨同堅持自己嘅生活理念。
W：我都覺得係，最緊要堅持，同埋我唔會介意對方年紀比我大，因為我好相信感覺。
記：有冇試過同年紀大過自己嘅女仔拍拖？
W：有，我當時讀緊中五，就快會考，而我鍾意個女仔考AL，所以成日喺自修室遇到。嗰時發覺大過自己嘅女仔幾好，教到我唔識嘅嘢，之後同佢拍咗一段唔短嘅時間。
記：將來亦唔介意同年紀大嘅女仔拍拖？
W：我唔會用年齡規限自己對愛一個人嘅感覺，亦唔會逼 自己揀大或細過自己嘅女仔，但同咩年齡嘅女仔一齊當然有分別，細個嘅女仔冇經歷咁多嘢，尤其當一個成長中嘅男仔，若果有一個好識教自己嘅女朋友，可以令你好專心行自己想行嘅路，呢一點好緊要。
V：我冇同細過我嘅男仔一齊，但我認同William所講，兩個人相愛同年齡冇關係，喜惡都冇關係，即係佢鍾意咩，唔一定我都要鍾意，最緊要係價值觀相同，然後尊重同認知對方嘅需要，喺適當時候，我會畀空間同支持，我要佢喺身邊嘅時候，佢就會自動自覺喺身邊Standby，嗰種默契好重要。