陳嘉桓（Rose）入行不久，但已接拍多個廣告及電影。繼令她一片上位的電影《葉問前傳》後，她將要在內地逗留兩個月拍攝古裝電影。Rose表示將再度跟內地女星黃奕合作新片：「黃奕好好人，我同佢都養狗，之前我哋拍《葉問前傳》時，已經成日圍埋一齊講狗仔經。」

Rose努力克服艱辛的武術訓練，證明成功絕非僥倖。

Rose拍《葉問前傳》時跟杜宇航學詠春。資料圖片

練功強身健體

Rose自兩年前起，跟隨師傅冼國林習詠春，毫無功夫底子的她，雖分外辛苦，但認為好處很多：「我以前唔做運動，好易氣喘同病。但練咗功夫之後，身體好咗好多。（父母戥你心痛？）都唔會，佢哋覺得學中國功夫係好事，又強身健體，好贊成我練。」

談到最初練功的情況，Rose說：「我啲筋骨好硬，所以初初練嘅時候，除咗記唔晒啲功夫招式外，連紮馬都有問題！師傅已經好用心咁去教我，但有時都會忍唔住鬧，有次師傅好緊張咁話我，我又好忟自己做極都做唔到喎！一路喊住繼續練，亦試過練完功，返到屋企匿埋喺房度喊，都係忟自己做得唔夠好。」