甄子丹攜同太太汪詩詩，與導演劉偉強夫婦、余文樂及汪圓圓亮相威尼斯，為電影《精武風雲˙陳真》造勢，該片首映大受歡迎，子丹全裸受刑一幕更令不少人看得目瞪口呆！劉偉強透露拍攝時子丹於重要部位黐膠紙，加上以遠鏡拍攝，故一定不會有「露蛋」場面：「呢場戲子丹拍得好辛苦！當時係冬天，零下十幾度，拍成十幾個鐘，見佢凍到震！（撕膠紙咪好痛？）比打仲辛苦，睇到我哋都覺得肉痛！（走光？）有都唔會畀你哋見到，鏡頭角度好好，唔會拍到啲唔應該拍嘅嘢！」
至於子丹則坦言不介意裸露，拍攝前更刻意Keep Fit：「當日舒淇原本冇戲份，不過佢帶埋幾個女化妝師嚟睇熱鬧，仲同人話：『有肉睇呀！』真係畀佢激死！」而他更與荷里活名導羅拔洛迪格斯惺惺相惜，傾到雞啄唔斷！
