細細個父母都有教守時係美德，做藝人有時間觀念就更加重要！有次台灣人氣組合S.H.E喺澳門開騷，佢哋喺台上又唱又跳，睇到班歌迷鬼咁開心，當晚唔少台灣同香港傳媒都有獲邀請採訪，仲有唔少傳媒係S.H.E嘅歌迷！完騷後，成班記者去咗後台等訪問S.H.E，小小So諗住咁耐冇見，就去後台同S.H.E打個招呼，當時大會已經通知要等半個鐘。小小So明白好多藝人開完騷都鍾意沖個涼、整理吓儀容先去後台做訪問，所以都冇咩所謂，可惜等了又等，最後竟然等咗超過一個鐘S.H.E先出現，要半百記者等咗咁耐，仲只係匆匆逗留咗15分鐘就走，唔知佢哋會唔會有啲唔好意思呢？