昨日凌晨填詞人黃偉文將一段2分34秒的短片在微博轉載，片段中林依麗疑似在地產公司環境下拍攝，有一把女聲談到慘劇後港人對菲律賓人有偏見，而容祖兒呼籲不應遷怒於女傭時，問林依麗有何睇法？她說：「有乜資格言論啫！啲歌星仔，唔係睇小佢，即係歌星仔咪唱佢嘅歌囉……」片段在微博流傳後，何韻詩、楊千嬅和張敬軒等紛紛留言「寸爆」林依麗。
語氣係咁拒道歉
昨日記者聯絡林依麗，她不認為「狂言」有錯：「佢唔係歌星仔咩？廿幾、三十歲之嘛，唱歌咪好囉，講咁多做乜！（形容具貶意？）佢咁介意咪叫番佢大歌星囉！我唔識上網亦唔識微博，係班夥計拍完整上去。（點解拍？）嗰日係全香港最傷心一日，自己都好唔開心，佢哋（指藝人）唔應該喺咁悲痛嘅時候講咁多嘢。（你意思係歌手冇資格評論？）依家傷口咁痛，唔係呢個時候囉！我啲語氣係咁，聽得唔舒服咪叫番你大歌星囉！（道歉？）傻o架！道乜歉？我又冇講啲乜，啲人鬧乜啫！（引起好多歌手不滿？）啲歌手想出名梗係想講吓嘢，如果係大歌星就唔介意人哋話你歌星仔，容祖兒我一首歌都講唔出，唔好博宣傳啦！」
個唱加場證人氣
昨日本報記者就此事聯絡祖兒，她說：「我唔回應林小姐嘅言論，呢個時期香港人應該化怨氣為力量，唔好搞咁多仇恨啦！」工作多籮籮的祖兒心情未受影響，除了接拍運動服代言廣告，其11月演唱會更已落實加一場，總共五場，前晚她出席Summer Pop慶功宴時便透露喜訊，證明人氣非一般「歌星仔」！對於無辜被嘲，祖兒在微博留言：「我只是說出我認為對的東西，無佢咁好氣。」她還來個自嘲：「等我這個歌星仔為自己打打氣先！加場啦！」至於好友何韻詩與林海峰、黃耀明昨日出席活動時力撐祖兒，阿詩說：「如果容祖兒係歌星仔，我都唔知自己係乜！」林海峰即抵死地說：「我哋係微塵囉！」
至昨晚9時許，自稱冇錯的林依麗再自拍短片擺上網：「奉勸一句：『煮豆燃豆箕，相煎何太急。』八條人命啱啱搞出嚟，你哋啲歌星博出位，無謂將件事搞大，如果容祖兒唔鍾意，咁我叫番佢大歌星囉！只係希望Jason（梁頌學）快啲好番。」但她卻辣有牙齒印的白韻琹：「白婆婆年紀大血壓高，唔想畀啲人博出位。」