居住篇

問：Dream House係點？

杜：我好鍾意食嘢，所以屋企廚房一定要夠大，同埋環境清靜。

陳：唔使太大，夠我同三隻狗住就得，基本上兩間房已OK！不過入行後啲衫多咗，最好有多間房騰出嚟做衣帽間！

問：乜嘢屋一定唔會住？

杜：離開城市太遠嘅唔會住，唔想坐成兩個鐘頭車先出到市區買嘢！

陳：太過金碧輝煌、裝修得太靚嘅屋都唔敢住，怕整污糟，又驚整爛啲嘢，住都住得唔自在！

社交篇：

問：第一眼會留意人邊部分？

杜：會留意人雙眼，因為眼睛係靈魂之窗，有時眼神交流已經可以睇得出一個人正唔正氣！

陳：眼睛。我嘅雙眼皮唔係好深，所以都唔鍾意人哋對眼過分大，咁好得人驚！

問：最討厭咩人？

杜：學武功嘅人好尊師重道，所以好討厭啲人冇禮貌同唔尊重人。

陳：不修邊幅嘅人！

嗜好篇：

問：除咗打功夫，仲會做咩運動？

杜：踢波、打籃球都啱！細個最鍾意睇《足球小將》，大個之後就喜歡米高佐敦，成日睇NBA，當然都有落場打。

陳：我比較懶，學功夫之前好少做運動，只係每星期上一堂體育課郁吓，仲有間中去學校旁邊條河度跑步。

問：有冇文靜一面？

杜：鍾意睇中國歷史同近代史嘅書，可以學到好多前人嘅事同一個朝代嘅興衰起落。

陳：讀書時已經鍾意畫畫，試過代表學校參加公開比賽，仲攞過優異獎！

飲食篇：

問：鍾意食乜？

杜：湯水最緊要！其他就係辣嘢，試過食到成條孖膶腸嘴，畀人笑！

陳：最鍾意食菜，為咗皮膚靚啲！依家盡量戒食肉類，連至愛嘅麥當勞都戒埋！

問：最憎食乜？

杜：我乜都敢食！試過去雲南食蠶蟲、蜜蜂同螞蟻，味道唔係太差！

陳：我比較揀飲擇食，生嘢同內臟都唔食，去到日本唔食魚生，只可以食拉麵。

番外篇：

問：享受花灑沖身定浴缸浸浴多啲？

杜：鍾意用花灑沖涼，水力一定要夠猛，打落個身先夠勁度，最怕水滴滴！

陳：我乜都鍾意快，所以沖花灑最啱我，最快可以用十五分鐘沖涼、洗頭兼吹埋頭，真係好勁！

問：有冇古怪習慣？

杜：練功時會唔着鞋，呢個習慣係近年先開始，因為想練埋腳趾力！

陳：鍾意攬住條毛巾瞓覺，我仲幫條毛巾改咗名叫「毛珠」！我又鍾意打側瞓，如果打平瞓會抖唔到氣！