大批市民和藝人昨日參加維園遊行悼念遇難者，亦有不少藝人因工作在身未能參與，他們各以不同方式送上祝福。陳奕迅（Eason）昨日出席《DUO陳奕迅演唱會藍光碟簽名會》，吸引700人圍觀，並派發200個簽名名額，司儀表示為悼念菲律賓遇難港人，活動不設遊戲環節。全黑打扮的Eason身穿印有PROBLEM（問題）和SOLVED（解決）字樣的T恤，他說：「希望大家似我件衫，以幽默感做人。」
心神恍惚講錯嘢
Eason呼籲大家向前看：「呢幾日曾經離港，有上網睇，睇到好多評論，要講嘅已講晒，不如大家向前望，依家好需要和諧同關愛，我哋可以當聚會。」但Eason顯得心神恍惚，連續三次將「藍光」碟錯講為「藍牙」碟，他說：「我個心有啲亂，因為好想去遊行。」Eason還帶領市民做出心形手勢，將愛心傳播開去，又以歌聲發放正能量，即席清唱了幾句《今日》歌詞，寓意大家做人要樂觀！
問到有否跟進相關報道？Eason說：「我呢幾日有睇到，啲人表現好激，事發時我喺飛機冇睇直播，我覺得憤怒唔可以解決問題，累積憤怒只會變成仇恨，我明白啲人唔開心，要相信香港政府，交畀佢哋做，作為市民，唔使再去研究邊個負責，倒不如關心其他人，尤其係呢件事受害者，大家唔好咁多怨氣，之後返港喺飛機睇到慘劇新聞，都淚流滿面，但生活仍要繼續。」Eason表示曾想過遊行，但因為早已安排工作，若然取消則影響很大。
「香港人要團結」
而祖兒昨日連趕兩場，下午出席《太陽計劃2010南區音樂峰會》，晚上則參加音樂會。活動開始時，大會安排出席歌手手繫黃絲帶，向事件中死傷者家屬送上關懷及鼓勵。祖兒在台上說：「愛戰勝一切！雖然今日遇到唔如意，但大家團結起嚟，話畀所有人知，香港人係唔『蝦』得，今日要帶歡樂畀大家。」另外，徐濠縈昨晚與女兒康堤從泰國回港，透露此行一家三口到當地度假，由於陳奕迅有工作在身，故於兩日前先行回港，雖然泰國政局尚未穩定，再加上菲律賓發生挾持人質事件，但阿徐表示不太擔心。
曾表示昨日會參與小段遊行的張敬軒，最終未有現身，他昨日出席活動時說：「因為記錯時間以為十點開始，原來係三點先開始，咁啱撞咗呢個活動，之後又要幫宣明會做嘢，所以去唔到，會精神上支持大家。」他又透露下載了內地警察處理挾持人質的短片：「佢哋會將人質安全放喺第一位，唔似菲律賓警方，唔將香港人生命放在第一位。」惟軒仔亦呼籲大家勿有過激情緒，亦不要攻擊菲律賓傭工。