豬扒港姐？
香港小姐選豬扒？真是弊傢伙！香港最具權威性的選美活動，竟被CNNGo揶揄選醜，大概沒有甚麼事件比這句話更具黑色幽默。但「福兮禍之所倚」，這不是令人留下深刻印象嗎？哪理得甚麼大牙肉或似周國豐，既然已斟了半杯水，已是踏入銀色旅途的好開始。
陳庭欣（Toby）阿Q精神自我調節
冠軍陳庭欣白白淨淨，點睇都不似「豬扒」，被指似前香港三分王翁金驊及講波佬何輝，自然心有不爽，Toby說：「有睇過呢啲報道，語氣好唔客氣，好彩只係寫，親耳聽到會更Hurt，不過都有好多支持我哋，冇可能要人人認同。平時見電視嘅明星同真人都唔同啦！好彩都有人讚我真人比上鏡靚！」
港姐上國際新聞確是好事，但寫你似豬扒卻真的打你落十八層地獄，她說：「其實CNN都係睇番香港傳媒點寫，我有睇標題，但冇睇內容，不過始終係CNN新聞，真係會唔開心！」但Toby擁有阿Q精神，在謾罵聲中，卻曉得調節：「自己識諗同埋睇得開，上網睇十個Comment，總睇番兩三個好嘅評語，令自己舒服啲唔會亂諗嘢！」
張秀文（Sammi）負面批評當作鼓勵
亞軍張秀文比較幸運，三甲之中，她是唯一冇份被人張冠李戴，但始終大家坐的是同一條船，Sammi從未感覺到置身事外：「雖然冇諗呢啲係侮辱，當然最好唔好講，其實好唔好嘅評論都預咗有人講，知道評判評分同觀眾唔同，佢哋會睇得全面啲！」
她又為港姐抱不平：「其實我覺得大家都靚，唔係網友講所謂嘅豬扒，只係有傳媒將小部分人意見放大咗，真係負面咗，咪當支持鼓勵囉！人先會有進步，要識得調節！」
莊思明（Lisa）慘被打壓泣不成聲
季軍莊思明是今屆港姐中最被打壓的一個，做了逾二十年人，才知道自己跟由細玩到大的周國豐如餅印一樣，那應該是笑還是哭呢？Lisa是個有自知之明的人，她從不覺得自己靚，也絕對不醜，對於被指似周國豐，她說：「真係幾慘，佢Send Message同我講：『你唔好理啦！啲人講啲咁嘅嘢，知你會唔開心，不過算啦！啲人講講吓唔記得，香港人咁善忘。』我同佢講唔好意思，拖咗佢落水！」
Lisa曾為這事哭得天崩地裂：「我喊唔係因為似佢，選完後兩日睇到好多人刻意攻擊，寫啲好過分嘅說話，好難聽，頭兩日逼自己睇，頂唔順都要睇，原本都OK，但家姐無端端走入嚟問我：『你冇事嗎？』我就如決堤，喊到一發不可收拾。」
過去的我！
每個人都有一個故事，不論你出身平凡，或是含着金鎖匙出世，人與人之間的連繫，足可拼湊成一個又一個故事，這三位女孩子故事的序，大概早已寫成。
陳庭欣：警察之後
因父親是警察，Toby自小擁有良好教育，她說：「爹哋係做警察，屋企都算係小康之家，安安穩穩！」13歲時，父親送Toby負笈外國讀書，性格從此變得獨立：「去到咁遠讀書，爹哋都理唔到我咁多，當地又冇親朋戚友，最初好可憐，過咗一段時間慢慢習慣，做咗Part Time後，就冇喊住返香港，既可搵錢，又學到嘢。」
張秀文：鄰家女孩
仍是城大學生的Sammi是一個比普通人更普通的女孩：「我絕對係喺一個普通家庭長大，但媽咪從小教我要懂得待人接物，所以佢好放心讓我好好照顧自己，包括讀書。媽咪從來都唔會逼我讀書，更因為咁，我更加發奮努力溫習，從來冇做過令家人擔心嘅事。」
莊思明：拿督之女
雖然貴為馬來西亞拿督三顆掌上明珠之一，想必生活無憂大把錢使，但Lisa笑說：「其實媽咪畀好少錢我使，未加『人工』前得三千幾蚊，佢覺得我要使得多就要自己搵。」對於零用錢少，連家姐莊思敏都嘲笑她連工人也不如：「工人都三千幾唔使出街，我出街就得四千幾。屋企架車得閒先會車我，平時我唔敢坐咁多的士，盡量搭多啲巴士，我以前咁細個就出嚟做Model，因為唔夠錢用。」Lisa更自爆入行全因母親：「阿媽好鍾意我哋做呢行，有次佢同老竇鬧交話：『我唔係同你結婚我一定好紅！』佢同家姐仲幫我填Form選港姐，寄咗出去我先知。」
若是有情！
拍拖是兩個人之間的事，關別人鬼事咩？但藝人的感情生活從來都是必須公開的一部分，然而港姐也是藝人，若是有情，只要愛得大大方方，哪管別人怎樣寫，一於去愛！
陳庭欣：上海男友愛錫
Toby真的有男友撐腰，男友對她十分細心，助她完成港姐夢，但她男友絕非外間所傳的旅行社太子爺黃進達（Jason），而是讀大學時結織的上海籍圈外男友，她說：「其實我一直都唔想公開男友，但傳媒都知同有問過我，所以先講，佢只係圈外嘅上海人，只可以講佢係喺英國識，至於佢叫乜名，同佢詳細資料真係冇必要交代。不過男友真係好錫我，縱使佢留喺上海，依然會上網留意我嘅新聞，仲會Send SMS鼓勵我，令我增加信心。」
對於被指與旅行社太子爺撻着兩年，Toby更覺得這是無稽之談，她說：「有網友話我同太子爺兩年前已拍拖，好似言之鑿鑿，不過講番事實，無論時、地、人都全部冇關係，我唔明咩叫特別照顧，Jason負責安排食嘢，選舉時我哋分開三Group人，唔明點解專跟我嗰Group。」
張秀文：期待愛情來臨
郎才女貌絕對門當戶對，Sammi坦言只希望男友有才氣，並不需要靚仔：「我一直都想做一個智慧型嘅女性，所以一定要男友比我叻，樣係其次，靚仔但乞人憎咁就冇用啦！好睇唔好食！」可惜現時Sammi連男友都冇，惟有望天打卦，期待愛情來臨。
莊思明：斷背情屬流料
兩個家姐的感情都有了着落，可是Lisa至今在情路上仍是尋尋覓覓，冷冷清清，傳的只是「流到爆」的斷背情，不禁令她嘆謂：「愛情？依家都未有着落呀！我都好耐冇拍拖喇！其實我要求都唔係好高，唔一定要佢叻過我，只要佢同我夾得嚟、人品好同心地好就得，可能我過咗桃花運啦！」
對於斷背一事，Lisa「Take It Easy」，她說：「我同男女朋友都好Close，我同男仔Close嘅相唔登之嘛，只要係好朋友，就算係Kiss嘴仔都無妨，呢啲只係禮儀。」
後記：出街冇人識
今屆港姐三甲都不屬於熱門一族，見報率低，即使出街亦未必有人認得。繼亞軍Sammi早前被記者當街問是誰？冠軍Toby又自爆瘀事：「當選完後，有次去做腳底按摩，阿姐讚我靚，問點解唔去選港姐？我忍唔住笑，又唔好意思同佢講我係冠軍。」