台模瑞莎日前被拍得在港睇樓，昨日她與「萬寧哥哥」沈志明出席時裝品牌Club Monaco活動時，直認有意出售家鄉烏克蘭其中一個物業，再在港置業：「雖然香港樓價好貴，但我覺得仲有得升！」並透露早前與阮經天拍攝一個牛仔褲廣告：「佢非常專業，超靚仔又高！（係你喜歡嘅男生類型？）外表係，但內在唔知。不過佢經常講笑，至少一齊唔會無聊！」
另外，沈志明同樣表示有意在港置業：「嚟緊一年將會有三分之二時間留喺香港！（買樓有乜要求？）唔可以太細，至少可以有足夠空間畀我翻觔斗。」談到港人在菲律賓遭挾持及殺害，瑞莎直言相當可怕，但認為任何國家也有好人及壞人，沈志明則直斥菲警無能，比不專業更不專業！
