25/08/2010

播放本新聞相關短片

小齊為人身安全 取消慈善騷

香港旅行團前日在菲律賓被槍手挾持殺害,造成慘劇,不少原定赴菲島工作或旅行的藝人,包括11月在當地開騷的任賢齊,紛紛宣布取消有關行程!

今次菲律賓流血慘劇,令全球震驚,兩岸三地藝人更極度關注,紛紛在微博留言為死傷者祈禱!不少原定稍後赴當地公幹或旅遊的藝人,現在亦陸續打退堂鼓!任賢齊(小齊)、楊千嬅、何韻詩、余文樂及內地女歌手韓紅等昨日均以素服打扮出席上海舉行的活動。活動開始前,大會安排全場起立,向死難者致哀,默哀1分鐘後,活動才正式開始,韓紅則換上紅衣亮相。

「依家情況唔適合開騷」

小齊原定於11月在菲律賓舉行演唱會,惟歌迷得悉當地發生流血事件後,擔心得留言叫小齊不要前往菲島,更要求他取消個唱!小齊昨日表示從沒去過菲島,本來於11月19日在當地開騷,但經過公司昨晨開會商討後決定取消:「呢個演唱會本來為當地華僑中文學校籌款,我都好想幫嗰啲華僑,不過公司認為依家嘅情況同氣氛,唔適合我去做演唱會,我一切聽從公司決定!我哋商討緊用其他方式,希望幫到菲律賓嘅華僑中文學校。」對於事件造成死傷,他感到非常震驚及心痛,同時直斥當地處理危機的方式:「佢哋有疏忽!人質安全最緊要,點解發生呢啲事?旅行團去玩本應開心,造成咁大傷亡慘劇……睇到新聞片心情好複雜同難過,希望所有傷亡者嘅家屬節哀順變!」

至於經常到佬沃賭場做騷的賈曉晨(JJ),家人誤以為她身在菲律賓:「屋企人打鑼咁搵我!我好忟同憤怒,咁多條性命!啲警察都唔專業,槍手要求唔係好大,可以應承佢、呃住佢先!喺當地未有合理解釋前,我唔會再去,就算公司再叫我去嗰度做騷,我都唔會接,作為一種抗議!」她寄語失去親人的家屬,要堅強及珍惜眼前人。

任達華:希望世界冇槍

而任達華(華哥)亦曾去過菲島拍戲及旅行,但短期內不會再訪當地,問到是否擔心安全?他沉重地說:「唔關事,係成件事氣氛好唔舒服!港人感覺應該同我一樣,去旅行有其他選擇!件事好有問題,當地政府要檢討,隨機應變唔夠,司機好大責任,話全車人死晒係影響營救,希望有個冇槍嘅世界!」

另一邊廂,原定下月赴菲島潛水的謝天華,現已改機票轉往馬來西亞。而曾到菲島潛水的鄭伊健則表示,贊成政府發出黑色旅遊警示,暫時亦無意再去當地。另外,身在美國登台的肥媽瑪莉亞,對事件感到驚訝,她激動地說:「黐線o架!過往去菲律賓都覺得唔安全,商場有軍隊嘅,如果非工作唔會去當地!原本下月去嗰度揀Band,依家唔會去,好大陰影!」

專案組