最近莊氏姊妹輪住上娛樂頭條，繼莊思敏公開整容兼隆胸、莊思明勇奪港姐季軍引起熱話後，較低調的「老二」莊思華（Mona）原來亦不愁寂寞，與告東尼之子告崇恩（Sean）已秘密拍拖1年！二人前晚與一班友人高調現身中環多處蒲點，雙雙狂歡至清晨，三姊妹各自各精彩！

告崇恩本來行先，莊思華及劉晨芝則殿後，後來二人愈行愈埋。

放大圖片

醉意濃腳步浮

身穿小背心襯短打的Mona，前晚出席活動後，即偕「亞洲版Beyonce」劉晨芝等好友乘車到中環Play狂歡，不到半小時，Mona等人便步出，轉場到Dragon-i出席楊其龍舉行的生日派對，不過可能愛郎Sean未有相伴，Mona不久便離場會合男友，最後移師另一名人蒲點Volar玩樂！二人沿途不時眉來眼去，Sean更多次刻意放慢腳步，遷就腳踏高踭鞋的Mona，甚有風度！蒲至凌晨4時左右，眾人再轉場到茶餐廳醫肚，酒過三巡後，Mona明顯腳步浮浮，Sean更索性拖實伊人，看來感情穩定！飲飽食醉後，眾人紛紛離開，Mona大方向記者微笑道別，才與Sean甜蜜離去。

雙方已見家長

記者昨日致電Mona，問到與Sean發展得如何？她甫聽男友名字即發出甜蜜笑聲，雖然已是公開事實，但她只說：「最近屋企火紅火綠，我唔想講咁多，總之我好開心啦！」其實她早已上載二人的合照上Facebook及微博首頁，親密關係不言而喻！至於莊思敏接受電話訪問時則代妹坦承戀情：「係呀！已經（拍拖）一段時間，雙方都見過家長！（贊成嗎？）佢依家先23歲，拍拖最緊要開心，佢開心就得啦！（介意畀細妹爬頭？）如果係我都唔介意！我短期內唔會諗結婚住，做好工作先！」對於細妹亦成為追訪目標，她說：「可能我同Lisa都係呢行，所以大家關心埋Mona，不過佢冇諗住入呢行！」

莊思明（左）與莊思敏前晚現身港男活動。

莊思華（左）已名花有主，未知會否介紹男仔給妹妹思明呢？ (資料圖片)