關楚耀去年於日本捲入藏毒案，轟動娛樂圈，他返港後已閉門靜思己過，專心創作音樂。事實上，Kelvin是幸運的，唱片公司並無放棄他，繼續為他出唱片，又替他舉行音樂會，而向來疼錫他的校長譚詠麟，也邀請他擔任演唱會尾場嘉賓，令Kelvin感激不已！他說：「呢年半真係過得好快，我當然有成長，至少睇嘢唔同咗，唔會太過執着，冇得擔心人哋點睇自己，依家完全投入工作。以前屋企人關心自己，好似係必然嘅，但依家睇番自己經歷，先發現好多嘢唔係必然。」

勇敢面對過去的Kelvin，不介意被舊事重提。

阿倫與關楚耀亦師亦友，鼓勵他積極面對人生。

問到是否不喜歡舊事重提？他說：「唔怕，反而覺得多咗機會分享自己古仔，我雖然做錯咗，但唔會為呢樣嘢打沉自己意志。」

壓力視作推動力

Kelvin今晚舉行「復出」音樂會，他直言壓力超大：「當然有壓力，而且好緊張，但會當作推動力，今次不容有失，絕對唔衰得，唔可以出錯。我出道到出事前，一直平步青雲，順順利利，直到去年出事，跌咗落人生谷底，好彩歌迷對我不離不棄，好多謝佢哋。」Kelvin的新碟籌備亦如火如荼，當中有首新歌《博愛》，問到是否其心聲？他笑說：「係微博個『博』咋！依家好多人都喺微博留言。（曾經博愛？）冇啦！」