張繼聰、Square成員Gary及James昨日出席活動，對於老婆謝安琪（Kay）表示為教囝囝張瞻性教育曾一同沖涼，張繼聰力撐說：「好正常！」問到有否試過一家三口一齊沖涼？他即拉開話題說：「我哋對個仔睇嘅價值觀好緊要。」而Gary被追問與「百果園咪神」陳靜翻撻，他口窒窒地說：「唔係翻撻，大家係朋友亦有聯絡。（再有發展機會？）唔夠膽咁講！」James則承認與緋聞女友岑潔儀仍保持聯絡。
另一邊廂，Kay、曹格與周麗淇出席另一活動，將於十月推出國語碟的Kay被問到會否擔心被台灣傳媒追問尖銳問題，她說：「冇所謂！唔相信佢哋會為難藝人。」曹格則恭喜周麗淇日前在慈善賽車中贏得亞軍，並表示曾在新西蘭炒車留下陰影：「依家唔敢揸快車，一坐屁股肌肉就硬晒。」