樣靚身材正的陳靜（DaDa）身邊不乏追求者，入行數月已爆出曾與譚詠麟愛將王宗堯及Square成員Gary拍拖，雖然均是分手收場，但再見亦是好朋友，兩位過氣男友更曾出口撐她的人品好。

據知，DaDa一直難捨與Gary的感情，當年同是模特兒的兩人太緊張對方，經常為小事嗌交，結果拍拖一年便分手，大半年後翻撻，可是因Gary入行後工作量大增而再告終。不過，據兩人密友指他倆始終放不低，DaDa入行後與Gary有共同話題，每遇問題即向他求教，造就兩人再翻撻。為保護再長出的愛苗，兩人小心翼翼拍拖但仍被撞破！

Gary與DaDa復合打得火熱，行街時搭膊頭浪漫一番。

Gary與DaDa初時行街十分避忌，隔住一個身位睇雜誌。

日前下午，Gary被發現獨自在尖沙咀的商業大廈門外呆等，企足差不多十五分鐘，原來是等情人！戴黑超及身穿跌膊衫的DaDa由大廈步出，雖收起D Cup巨胸，但甜甜一笑已冧爆男友！礙於途人甚多，兩人拍拖相當避忌，相隔幾個身位看雜誌。直到轉入小巷，Gary主動幫女友拿購物袋。

即場彈琴冧女友

其後，兩人到琴行睇樂器，即場玩鼓又玩琴。Gary懶理其他客人，即場彈歌冧女，氹得DaDa一臉感動及拍手，非常Happy！離開時，他情不自禁拖實穿上高跟鞋的DaDa，十指緊扣擺明愛火重燃！兩人隨後往甜品店食冰「降火」，進入店後見食客不多即放下戒心，公然「你一啖、我一啖」互餵，還甜蜜咬耳仔，相信呢場「火」都幾難撲熄！

DaDa與Gary往甜品店撐枱腳，一人一啖互餵食冰，還不時咬耳仔。	放大圖片	Gary露兩手即場彈情歌，冧得DaDa笑晒口。

記者致電兩人求證翻撻一事，兩人齊以「好朋友」作答，DaDa說：「我哋係有約會但唔係拍拖，因為應承公司畀心機做嘢，大家只係好好好好朋友。」Gary則說：「拖佢因為佢着高踭鞋，大家一直係好好好好朋友。（再拍拖？）以後嘅事冇人知。」對於DaDa翻撻Gary，她的經理人公司老闆施念慈受訪時暗示，若影響事業的話將出手棒打鴛鴦：「做嘢緊要，太過分咪搵棒掃吓，畀啲提示佢哋囉！（識唔識Gary？）見過吓，印象中幾好嘅。」