潮模周秀娜向來性感惹火，但私底下卻返璞歸真，連選內衣褲都專攻淨色，睡裙更是至愛，相反豹紋、花花及喱士花款則一律Say No！
睡衣篇：
記：鍾意着T-back、高腰定低腰嘅內褲？同埋邊類圖案呢？
娜：我鍾意低腰同淨色嘅。
記：着便服、公仔睡衣定性感睡衣瞓覺？
娜：冇特定喎！便服多！
解說：依家好多褲都係低腰，着低腰Under會方便啲！其實內褲我鍾意襯一Set，但好多時因為Size問題，未必襯到一Set，所以會分開買，不過一定要淨色！內衣褲最緊要舒服，唔需要太花巧。瞓覺要着得舒服，所以着便服瞓都有，當然睡裙最舒服，好似冇着咁！
鬼神篇：
記：開燈瞓定熄燈瞓？
娜：喺屋企一定熄，不過住酒店就開！
記：信唔信有鬼？
娜：寧可信其有，我相信有鬼o架！
解說：我一直都信鬼神，好彩暫時冇遇過鬼，同埋我好怕夜晚聽鬼古，費事疑神疑鬼，嚇親自己！屋企人都會幫我求啲符傍身！住親酒店，我一定開晒所有燈瞓，哈！因為怕有鬼嘛！屋企係自己地方，安全又舒服，一定熄晒燈先瞓得着！
難題篇：
記：如果喺(車立)度放屁，個個都懷疑係你嘅時候，你會有咩反應？
娜：哈哈！我未試過，如果真係有放，會講唔好意思囉！
解說：好彩未試過喺(車立)發生過咁尷尬嘅事！不過我試過搭(車立)時有人放屁，其實呢啲嘢控制唔到，所以我唔會周圍望，當冇事發生就算，因為人哋會好尷尬！如果真係自己放屁，我會講唔好意思，冇理由扮冇嘢兼去扮懷疑人，咁樣好衰！
飲食篇：
記：試過咩方法減肥？最嚴重減到咩程度？
娜：冇減肥，壓力大自然會瘦！
記：有冇偏食？有咩一定唔會食？
娜：冇偏食，有時甚至可以個個鐘頭不停食！
解說：舊年多嘢做，一有壓力就食咩都唔吸收，所以舊年最瘦時得番90幾磅！其實我好食得，之前去台灣做嘢，因為成日喺影樓，我幾乎每個鐘都食嘢！