小小So日前去無綫探幾位老友監製班，咁啱撞到喺台灣飛過嚟錄影節目嘅林曉培（Shino），雖然小小So同佢唔係好熟，只係知佢早幾年醉駕撞死咗個護士，不過佢就好有禮貌，主動同小小So打招呼，仲好似新人咁自我介紹添！
小小So見佢咁乖即刻問候佢幾句，Shino喺小小So心目中係一個外表剛強內裏柔弱嘅女仔，喺傾偈嘅過程中小小So仲覺得佢好堅強，佢話依家努力四出做騷嘅目的係還債畀死者家人。
小小So問佢覺唔覺得罰款太多？樂觀嘅Shino就話：「生命是無價的，看樂觀一點，努力賺錢還債吧！」唔講唔知，原來Shino努力賺錢之餘，仲經常參與慈善活動。小小So認為每個人都有犯錯同過去，都要畀機會人改過自新，希望Shino往後嘅歌唱事業順順利利！