不少明星屢傳整容，早前Lynn便被網友翻舊帳，直指她是人工美女，未紅前腮骨突出兼擁有一個「插蘇鼻」！昨日Lynn、曹敏莉及名媛李夏美茜等同任《Furla 2010秋冬預展》嘉賓，身穿一條連身短裙的Lynn束起秀髮，瘦削面形及高挺鼻子與以往大相逕庭。對於被傳整容，見慣大場面的她竟然尷尬口窒窒，更不自覺面紅耳熱：「呢個世界冇醜女人，只有懶女人！如果覺得自己唔靚唔一定要整容，電視都有教人扮靚嘅方法，例如着衫或化妝。好多謝佢哋搵番我啲舊相，睇番都覺得變化好大，咁多年努力都係值得嘅！」

再問到有否整容？她模棱兩可的說：「我覺得唔好囉……唔一定變醜，都可以變靚。（你接唔接受到？）唔係接受唔到，而係有其他更好嘅方法！（畀人傳開就成日寫？）我唔介意！如果咁多年都冇變化同冇進步，就會畀社會淘汰！」談到男友郭富城曾表示介意女友整容，她信心十足地說：「我唔怕！呢啲新聞唔會打擊到我！況且我哋之間唔係講呢啲！」並着記者摸其臉驗證真偽。

Baby否認被曉明鬧

席間，Lynn即場展示早前到英國工作購下的手信，並冧爆透露城城曾收過其小禮物：「係一啲特產，詳細唔可以講！（城城收到係咪好開心？）唔記得，咁耐嘅事！（有冇收過城城送嘅手信？）朋友出埠都會買畀我，但唔話得畀人聽，係人哋嘅心意，要尊重！」

此外，最近有指Angelababy到北京與緋聞男友黃曉明密會時，被曉明叉腰喪鬧，她昨日急急在微博澄清，慨嘆新聞已變質，並力撐曉明是好人：「每個朋友都對我很好，我也從來沒有被罵過，謝謝關心！這篇新聞可信度是負100！把一個大好人變成有暴力傾向，那分明就是指鹿為馬！」並上載一張鹿的相片。師姐Lynn對此說：「之前同曉明合作過《葉問2》，但唔熟，唔方便評論！（Baby喺微博澄清？）我信佢，佢先係當事人，不過我就接受唔到男人打女人！（教Baby冧仔？）我唔識喎！」

曹敏莉十月擺酒

另外，曹敏莉透露10月28日在四季酒店擺酒，找來妹妹任伴娘，好姊妹戚黛黛則擔任司儀。她表示目前忙於場地布置，問到過程中有否與未婚夫爭拗？她說：「佢信我意見，因為佢知我揀得嘅都係最好，所以先揀佢！」