前有線主持林熹瞳（Rachel）在電影版《怪談》中毫不錫身，獲Fans封為心目中的最佳女主角，並自製「影后」獎座以示鼓勵：「收到嗰刻真係好感動！拍戲幾辛苦都值得！我一直以嚟都好想喺電影方面做出成績，希望第時攞個真嘅『最佳女主角』獎座，報答Fans！」
感性相冊
「呢本相冊係一個女Fans好用心機整畀我，編輯咗我出道至今嘅好多相，仲有好多感性嘅文字，Fans話感覺好似同我一齊成長，我嘅生命影響佢嘅生命！我鼓勵佢努力讀書，結果佢考到第二！令我好感動！」
貓貓公仔
「貓貓公仔係一個Fans喺日本公幹嗰陣買畀我，我不嬲唔鍾意啲太卡通嘅公仔，但好鍾意呢隻貓貓，因為覺得佢夠真！雖然我依家已經唔會好似細路女嗰時咁，同啲公仔傾偈，但我都好重視每一份Fans送嘅禮物，每隔一段時期，都會攬吓啲公仔同整理吓佢哋！」