安仔上周四飛馬來西亞舉行《BIG FOUR演唱會》，原定昨午返港的四子，只有梁漢文（Edmond）和蘇永康現身機場，安仔和張衞健則冇影，Edmond和康仔說：「佢兩個冇咁快返。（避記者？）唔係，商務客位爆咗，我哋跟大隊先返。（安仔心情影響演出？）冇，佢好專業，成個騷好順利，四個都開心。（聯絡舊愛？）呢排比較忙。」對於安仔舊愛在千言書中提到不想驚動愛情，Edmond說：「畀啲空間佢哋三個。」

由於Michelle是康仔女友的好姊妹，故他亦替Michelle講好話：「尤其Michelle，承受壓力好大。（安慰佢？）暫時未有，唔知女友有冇打畀佢。（想安仔同Michelle復合？）佢哋咁大個人要尊重決定，希望三個開心。」他們坦言事前不知道安仔和Michelle分手：「只係張衞健Feel到安仔聲氣少咗，但安仔依家還好，有工作，好過日日喺屋企發吽哣。」至於有指Michelle偷睇安仔的SMS，康仔說：「匪夷所思！我哋咁埋身嘅朋友都唔知。（擔心Michelle爆料？）冇得擔心，香港有言論自由。」

三子唔敢玩緋聞

至於安仔於晚上10時半返港，健仔陪伴左右，安仔全程冇表情，只耷低頭直行，無論記者問甚麼都拒答，期間有電視台的咪牌不慎拍到他的面，安仔即有少許黑面！安仔沿途急步走，只開金口說了四個字：「唔好意思。」而同行的健仔則指安仔心情OK。而之前在記者會上，三子曾戲言會將安仔與舊愛的緋聞搬上舞台，但最終隻字不提，以免愈描愈黑！