09/08/2010

播放本新聞相關短片

林峯反讚夠妖:正一姣婆

黃宗澤在新劇與林峯爭女,但現實的他感情生活則精彩得多,除有胡杏兒外,還與梁靖琪傳緋聞,但他卻謙稱與有錢又靚仔的林峯爭女唔夠揮,反被林峯讚夠妖艷有得爭。

林峯、黃宗澤(Bosco)、劉松仁、葉童、張嘉兒、梁靖琪(Toby)、楊秀惠及內地演員趙子琪與宋汶霏等,昨日到深圳觀瀾湖宣傳新劇《摘星之旅》。

因拍攝《摘》劇而與Toby傳出緋聞的Bosco,被指當時激親女友胡杏兒,最後要到沖繩旅行箍煲。問到今次再跟Toby宣傳會否怕惹怒杏兒?Bosco笑說:「啲緋聞係宣傳啫!得啖笑。」至於Toby亦表示未有因與Bosco一起宣傳而感尷尬:「拍每套劇都會傳一次,下次可能傳不和。」

葉童認黑面誤傳不和

Bosco於《摘》劇飾演大奸角,陷害林峯全家兼爭女,但他笑言現實一定不會:「現實中未試過爭女,如果對方係林峯,我即刻掉頭走啦!佢有家底又靚仔,除非個女仔鍾意啲妖艷就會揀我。」對於Bosco揚言唔敢爭女,林峯則無奈說:「唔係嘛!我足不出戶喎!其實大家唔同類型,Bosco好妖艷,正一姣婆四!(有冇試過爭女?)冇!(唔使爭?)我都想揀到最終嗰個。」

另外,同樣因拍《摘》劇而傳不和的葉童與劉松仁,昨日首次公開碰面,但兩位「成年人」未有尷尬。葉童指劉松仁像哥哥般照顧大家,反而自認性格反叛不愛別人照顧,故有時會黑面而產生誤會,但昨日再見有如「小別勝新婚」的感覺。

影視組