鍾蕙芝與經理人Admond早前因酬勞問題反目，她曾開腔力數對方拖數及逼她接性感工作等多宗罪，兩人關係勢成水火！據知，兩人拗撬牽涉一輯Lavina的超激性感照。

Lavina前晚深夜在森美的電台節目中，再次數臭Admond，指接下不少性感工作，但得不到應得報酬：「我好似棋子，佢話Book好晒攝影師同場地，唔影就要我賠錢，作為新人邊有錢？最後都要……總之我做乜都得唔到回報。」森美問她是否指金錢？她激動地說：「唔止，佢仲話將來唔需要咁性感，但都冇兌現到。」談到現時靠兼職設計工作維生，又備受輿論壓力，她即時喊爆。

Admond叫律師出信

未知Admond是否聽完節目被辣，昨日凌晨在Facebook不開名斥罵：「點解都重（仲）係要出來扮可憐，博同情，次次出來都要講我做新聞博見報。」他又斥利用做慈善去博同情的行為令人反感，又反問誰逼人在蘭桂坊打記者；翻查資料，Lavina曾牽涉一宗蘭桂坊打架事件。

本報記者昨日致電Admond，問是否指控Lavina，他只說：「我冇指名道姓，只係尋日有啲嬲，要發洩吓，如有雷同，實屬巧合。（蘭桂坊件事同做慈善都指向Lavina？）好多人都試過喺嗰度打人。（話佢秘撈？）總之我話嗰個人私自做PR（公關）。」提到Lavina的合約問題，他指雙方尚有4年合約，又暗寸遭她誣衊：「叫律師出封信畀佢，紙包唔住火，希望佢唔好誣衊我。」

推出產品不知情

據知，Lavina去年拍攝雙手遮點性感年曆照時，還拍下尺度比面世照片更大膽的超激照。本報記者昨日致電向她求證，她說：「當時好激，但一定有貼乳貼同着內褲！有啲相喺經理人同攝影師手上，之前做年曆，後來我唔知情，用咗嚟做成人台廣告同出產品，擔心再做其他商業用途。佢承諾性感啲嘅原相唔會發放，仲會銷毀，但當時冇簽文件，只有口頭承諾，依家覺得好蠢！」

而對於Admond的不開名指控，Lavina直斥對方低莊：「佢冇指名道姓，我唔會對號入座，總之我冇做不道德行為。不過，作為男人唔應該說三道四中傷女仔，好低莊！男人應該大方啲，唔好喺Facebook做小動作，要鬧就光明正大，唔好暗示。」