昨日有報道指有澳門「富二代」被綁架，身為名人第二代的趙式芝接受訪問時，直言不擔心成為下一個目標，並漏口風說出父親趙世曾01年被綁架的另一版本！

據當年報道，趙世曾於01年在深圳被三名蒙面刀客擄上的士，搶去名錶及企圖綁架，最後他跳車及撲落河逃脫。不過，趙式芝口中卻另有案情：「當年好興上深圳玩，我老竇都鍾意去，有次佢畀人綁架咗，幾日都唔見人，我仲以為佢去咗旅行。」她坦言父親一直沒有提及被綁架一事，是多年後從朋友口中得知：「我老竇同我朋友講，當年佢畀人捉咗喺間屋度幾日、綁住手腳，期間佢留意住匪徒嘅動向，趁有日得一個匪徒喺度嘅時候，佢解開自己手上嘅繩，再撞向匪徒，跟住逃離間屋不斷跑，途中見到有個水池，佢跳入水池，直至後追嘅匪徒遠離先上水，再跑到有公安嘅地方。」她估計當年父親未有告訴家人，是擔心嚇怕家人。

跳落坑渠水逃亡

對此，趙世曾否認曾被綁架，堅稱只是差點被綁，他強調：「我冇畀人困過喺屋，當時只係差啲被綁，我即時同佢肉搏，當年後生，夠氣夠力，都只係博一博。（你跳落水池避開匪徒？）唔係！係好污糟嘅坑渠水，為保命好污糟都要跳，佢哋見我一路跑、一路嗌就冇追過嚟。（請保鏢？）有一段時間用公司保安，過咗一排都冇。（擔唔擔心仔女安危？）香港咁安全，我又冇仇家，唔擔心，唔需要請保鏢。」