玄學家司徒法正經常四出訪尋奇怪嘢，私底下都係一個玩得之人，有次小小So喺餐廳撞到佢，有個侍應行去師傅度問佢係咪成日都會見到啲唔乾淨嘅嘢，師傅就笑笑口唔答，後來個侍應落Order，好認真咁數極都話見到有八個人，但係佢哋明明只係得七個人，呢個時候師傅就上演咗一幕同空氣講嘢嘅逼真對手戲！
侍應：我數咗好多次都係八個人喎！
師傅：（望桌下）都叫你唔好出嚟㗎啦！快啲匿番入去！
侍應：你同邊個講緊嘢呀？
師傅：（作狀打空氣）都話你㗎啦！教極都唔聽！
後來個侍應好騰雞咁走咗，究竟係侍應數錯定係師傅當時真係見到嘢，真係不得而知喇！小小So食完飯出咗去搭車，本來想上架有好多空位嘅小巴，點知小小So揮極手，架小巴都冇停低，真係激到小小So紮紮跳！呢個時候，師傅行過嚟同小小So講：「頭先架小巴坐滿晒人喎！佢梗係唔停畀你啦！」佢講完之後，雖然嗰時係日光日白，小小So都忍唔住打咗下冷震！