無綫《香港先生選舉》昨日受到香港男士關注組、愛護家庭家長協會及平等公義協會批評，指參賽者的泳裝近乎全裸，加上現場清一色女觀眾及容許女嘉賓對參賽者摸手摸腳，有歧視男性之嫌，故向廣播事務管理局及影視處投訴，直言21日決賽當晚打算直踩電視城抗議！廣管局則透露自07年起共接獲相關投訴達86宗，但指投訴屬持牌機構製作方面的編輯自主，不屬條例規管範圍，已轉交無綫及相關執法機構跟進。

無綫外事部副總監曾醒明否認節目侮辱男性：「節目只想帶出氣氛，今屆特設圓方戲院同奧海城直播，男女都可投票參與。（女嘉賓太肉緊累事？）無綫有指引叫女嘉賓唔好有身體接觸，講嘢唔好太挑逗，但女嘉賓好多係演員，表現投入係會激啲。」

「唔好成日反乜反物」

原本有望成為今屆港男司儀的周秀娜，被問到有團體投訴節目時說：「香港愈來愈多顧問團，唔好成日反乜反物啦！呢個世界唔係仔(目及)女，就係女(目及)仔！個節目都係想效果好！如果演變到仔(目及)仔、女(目及)女，唔通就冇投訴咩！我好想做當晚司儀o架，但因為要拍戲，電影公司唔放期，迫不得已推咗，但我會盡量度期做嘉賓，戴定Con去(目及)仔！」

司儀之一的呂慧儀亦力撐無綫：「全女班評判唔算歧視，係慣例！畀着兩公婆一齊入場，個老婆都睇得唔放啦！反對人士唔好去電視城抗議，不如去奧海城同圓方，嗰度有3D睇。」另一司儀鄭裕玲則表示對公司決策冇意見。港男監製衛世輝則表示對無綫保安有信心，不擔心抗議人士踩場。

歷屆冠軍力撐健康

過往的香港先生亦不認為節目歧視男性，07年冠軍袁偉豪指觀眾應以開放眼光看節目：「唔係着泳褲就等於色情！」上屆冠軍許家傑亦力撐節目健康，穿泳褲只帶出陽光感覺，對於有團體欲踩場抗議，他說：「佢哋入到嚟先算啦！我就嚟生日，最好帶埋蛋糕嚟！」05年冠軍高鈞賢認為只得女性評判是節目傳統，覺得氣氛會更好。