本文重點
港姐季軍莊思明被網友嘲笑最後環節似「花師奶」，連譚詠麟在微博也笑其髮型似「鳥巢」！昨日莊思明大方笑說：「我都覺得似花師奶，但髮型師堅持靚，我都有啲耿耿於懷，嗰時時間緊迫，又冇照鏡，惟有信佢，都有啲介意o架！真係出咗事嘛！但冇得介意，我燒晒尋晚啲相！（驚唔驚再被攻擊？）預咗啦！」至於被指靠家姐莊思敏得獎，她笑言如果家姐真有此能力，她應得冠軍。
莊思敏代妹抱不平
此外，莊思敏昨晚率領家人到中環蘇淅同鄉會慶祝妹妹思明奪獎，對於無綫接投訴指妹妹入三甲為造馬，她為妹妹護航：「造馬呢個字對我個妹、評判同台前幕後人員都好唔公平，我妹妹係付出好多，如果係點解唔造個冠軍畀自己？佢係實至名歸，尤其係問答環節，佢嘅表現出乎我意料地好！」問到認為妹妹欠缺甚麼而未能奪冠？她說：「港姐畀人感覺係高貴大方，妹妹啱啱讀完書、冇咩工作經驗又係細路女，佢係可愛多過高貴大方。」問到是否妹妹受「花師奶」髮型所累？她即笑說：「初時我睇到都嚇親，後來我撞到嗰個髮型師，佢話覺得好靚，我認為好彩個髮型臨尾出場先見到！」