陳庭欣（Toby）昨日出席活動，談到被指爆冷當選，她並不認同：「當晚喺無綫官方網嘅投票，我都係排第二，我唔知點至叫做爆冷，總之我平常心參加。（網友話你笑得肉酸？）我係笑得唔好睇，但係冇諗點樣笑得Sharp啲，只係自然咁笑，都有練習過，已經比以前好。」問到被質疑因得康泰太子爺黃進達力撐而得獎？Toby自爆男友是內地人，拍拖已一年半，在英國讀書時認識。

亞軍張秀文（左起）、冠軍陳庭欣、季軍莊思明及最上鏡小姐李雪瑩當選翌日，出席活動舉杯慶祝。

陳庭欣出席慶功後回家，揮手道別。

楊寶玲大派定心丸

至於所獲得總值逾二百八十萬元的后冠連首飾，贊助商六福曾收假金，Toby同樣有信心：「唔怕！相信六福有專人驗證，足唔足金唔係問題，最緊要外形靚，后冠、首飾冇諗過要賣。」亞軍張秀文同樣表示不擔心假金問題，因她不曾想過變賣獎品，自言滿意比賽當晚表現，睡得很好。至於身為股東的楊寶玲對於其珠寶店「中招」收到假金，她大派「定心丸」：「公司有百分百保證，有問題一定回收，大家唔使擔心。」

Toby出席港姐慶功後，乘無綫專車返回黃竹坑警察宿舍，皆因陳爸爸是警員，她透露凌晨返家後仍要拍攝《東張西望》，直到四時才就寢，因太累很快便入睡。

接18宗投訴轟粗鄙

此外，無綫及廣管局分別接獲十八宗有關港姐的投訴，包括九宗指莊思明當選屬造馬、七宗指意識不良及兩宗指曾志偉言語粗鄙；收視方面，平均25點，最高29點，近185萬觀眾收看。無綫外事部副總監曾醒明表示內地及台灣網民直擊賽事，點擊率高達583萬次，瀏覽人數約66萬。而亞視用以對撼的《青春無敵Free D水運會》只有3點收視，並接兩宗投訴指意識不良。