基仔為剛推出的新碟《時代》造勢，昨晚在尖沙咀舉行見面會，約60名歌迷到場。大會邀得基仔好友森美擔任司儀，他們在台上大談o靚模及公主病等人氣話題，周秀娜、A. Lin及DaDa Lo等預先錄製「抗議」片段，辯稱性感無罪！

Lorraine戴口罩低調捧場。

基仔獲男孩獻吻，喜上眉梢！

森美表示要分辨o靚模，只能靠她們胸前的事業線：「條線長啲就叫Carol，麥玲玲嗰條就最長，我自己就係咁分囉！」基仔說：「呢個係成個娛樂圈都感覺到，上年已經討論緊呢個話題，相信出年都會係咁。（避開唔喺暑假出碟？）唔會，我都幾鍾意喺暑假出碟o架！」至於以o靚模為主題的新歌《北半球選美離奇火警事故》，問到會否邀o靚模做MV女主角？基仔笑說：「或者搵佢哋拍，但係要着得密實同埋唔畀搽太陽油啦！（冇北半球睇？）咁要再度度先得！」

否認拍拖睇豪宅

大會又邀得多名男歌迷上台，大數公主病女友的「惡行」，問到是否因為「身邊嗰個」（指緋聞女友Lorraine）有公主病，故有感而發？基仔說：「冇喎！我冇遇過有公主病嘅人！」似隔空冧Lorraine！而Lorraine亦戴口罩捧場，繼續保持低調作風。對於早前兩人被指拍拖睇豪宅，基仔指當日是拍攝《時代》的MV，而他亦暫未有買樓打算。