唐貝詩因為喺微博寫咗「盆景貓」事件，搞到被千夫所指，身為媽咪嘅寇鴻萍亦因為咁，煩咗一段時間。小小So日前同寇鴻萍傾開偈，佢話心情已經平復咗，冇乜特別，但因件事關注多咗個女嘅微博，發現原來阿女文筆唔錯，而且好有諗頭。
寇鴻萍話：「阿女啲英文不嬲都唔錯，但原來佢啲中文都幾好，有時睇佢寫嘢，發現佢情感好豐富，好有諗頭，我有同佢講，可以向呢方面發展。佢下年畢業，雖然未知佢想做乜，作為父母當然想佢幫我哋手做生意，但我唔會強迫佢，依家反而鼓勵佢多啲寫作。」
小小So問佢如果寫中文，係咪要再深造吓，寇鴻萍即時話：「係啊！我已同佢講咗，大學畢業後，去北京讀碩士學位，等佢學多啲中文，你知依家中文好重要。」