組合Donut昨日連走兩場，早上亮相香港動漫電玩節開鑼、下午再到VMIX酒吧為寫真集舉行簽名會。昨日Donut以2010動漫女神身份出席動漫節開幕禮，載歌載舞，但演出麻麻，咪嘴兼跳舞動作生硬，成員Rainbow解釋因太緊張所致，但又指組合已經排舞達半個月。提到被大會封殺的周秀娜仍犯禁率先入場宣傳，Rainbow語帶不屑地說：「對知名人士嘅區分，大會自有原因。（做動漫女神地位超然？）我哋做動漫女神，身份唔同，女神幫手宣傳意義重大。」

Donut於酒吧搞簽名會，獲不少男Fans支持兼送花。

放大圖片

寫真賣逾二萬本晒命

至於在酒吧簽名會上，Rainbow指寫真集已賣出二萬零五百本，並乘機宣布將於下周二（3日）殺入動漫節搞簽名會，記者指她似在晒命，Rainbow即說：「唔係，只係講畀大家知有簽名會啫！到時我哋會着上青春短裙服飾現身。（冇其他o靚模做對手，仲要性感？）要贏人先要贏自己嘛！」