羽翹透露首次有對白的電影就是《出水芙蓉》，當時仍是大學生的她，坦言有八卦小方與阿嬌的緋聞：「我都好想知佢兩個有冇異樣，所以我成日趁化妝嗰陣，喺塊鏡度裝佢哋。（神秘失蹤？）冇！不過嗰陣小方幫個潛水相機做代言，成日勁Sell我哋買，佢成日用部相機影阿嬌。（有冇影你？）冇呀！佢淨係影阿嬌！」她指兩人是好朋友，對新人完全沒有架子，最難忘他們與劇組夾計，為她送上生日驚喜：「嗰日我係最後一個埋位，行到出去就見到兩個大蛋糕，大家竟然記得我生日，仲為咗我停機兩個鐘慶祝，當時真係勁冧！」

羽翹與小方及阿嬌合作《出水芙蓉》，感激二人照顧。資料圖片	羽翹大談拍戲時的趣事及難忘事。	羽翹為演好角色，專程返內地學跳水。

跳水300次周身瘀

此外，羽翹大讚阿嬌非常友善，由於她當時仍未簽任何經理人公司，所以在片場經常「冇啖好食」，阿嬌卻處處照顧：「佢會請我哋食嘢，依家出活動見到都會同我打招呼、傾偈，絕對唔會拍完戲就唔識人！」

向來怕水的羽翹，為拍《出》片挑戰自己學游水：「開鏡前已經搵咗個教練學足成個月，喺戲入面又扮到好勁咁，所以我哋早過劇組三日返內地，跟國家隊教練學游水，淨係跳水每日最少都跳三百次，仲唔識就力搞到成個身都瘀晒添！」但她強調沒有身材，戲中都以密實型的鯊魚泳衣示人，性感鏡頭則交予戲中隊友周秀娜負責。