莫文蔚（Karen）與Swing昨晚在九展舉行《拉闊音樂擂台第一擊》，吸引不少圈中人捧場，包括陳奕迅（Eason）、梁漢文夫婦、Eric Kwok女友葉佩雯及莫文蔚父母。有「靚腿」之稱的Karen，穿上上身如乾濕褸造型的高衩緊身衣，雖然有Legging打底，但兩邊超誇張式高衩設計，勁騷誘人長腿之餘，更一展圓潤「靚股」，其性感型女打扮與Swing一派學院懷舊Look造型，有點格格不入。

莫文蔚與Swing舉行音樂會，齊齊Jam歌。

穿上高衩緊身衣的莫文蔚，凸顯圓渾Pat Pat。

不過，三人台上Crossover演唱相當合拍，表現High爆在台上四圍走，觀眾全程企起身拍和，氣氛熱烈。Swing指Karen已很久未有在香港演唱，Karen興奮大叫：「好開心返屋企呀！」而成員Jerald更提議她應該騷個背面給觀眾看一看，Karen一臉疑惑，Jerald即笑笑口說：「因為你個籮柚囉！」引來全場大笑！

莫文蔚的父母欣賞女兒演出。	陳奕迅邊捧場，邊充當攝影師。	男友Eric Kwok開騷，葉佩雯當然要到場支持！

其後Jerald唱《半張飛》甩嘴，他尷尬自嘲：「記錯咗另一個Version，唉！自己作詞都唔記得歌詞。」Eric即加把嘴揶揄：「人哋天王巨星都係咁，但人哋有幾千首歌，你得幾十首就抵打啲。」而Eric望着台下女友葉佩雯邊唱「You are so fat」十分搞笑！

笑拍檔「甲組腳」

之後Karen唱《陰天》又施性感招數，換上背心短裙邊唱邊跳到鋼琴上，如「小野貓」上身不停轉換姿勢，又瞓又爬，動作誘人大膽。Swing兩子不讓Karen專美，將短褲向上摺變成「熱褲」，與Karen靚腿一鬥長短，卻慘被笑是「甲組腳」，場面搞笑，連Eason都忍不住到台前拍照！

完騷後，Jerald大讚Karen第一套衫的造型「好勁又Sexy」，令他不敢多望，又指Karen爬鋼琴一幕，差點連他都想爬理一份，Karen即笑說：「你都係彈琴好啲。」對於Eric公然笑女友肥，Karen都不值他所謂，力撐肥都是可愛，Eric卻說：「佢可愛咗好多年啦！」