麥浚龍（Juno）上月初自爆與曾擔任其MV女主角的中英混血模特兒Janine撻着，兩人拍拖短短10日，他即主動公開戀情！獲確認「新龍嫂」身份後，由原本一位寂寂無聞的Model，Janine火速人氣急升！原本與家人居住於元朗的Janine，與Juno拍拖不足兩個月，最近已火速進駐男友位於淺水灣道56號、價值近4億元的豪宅同居！

愛巢換Look晚膳

日前下午2時半，Janine在數碼港出席活動後，獨自乘的士返回愛巢，當的士駛入屋苑時，保安主動向她揮手打招呼，可見保安已見慣見熟。兩人在家短敍3小時後，Juno獨自乘七人車往鰂魚涌公司，雖然要傾公事，但仍吩咐司機返回寓所接女友，然後再折返公司。

變Look前 Janine（左）變身前着橫間裙、孭灰色袋，與友人在路邊等的士。

變Look後 Juno與Janine十指緊扣任影，無論衣着甚至笑容視線都一致，甜到漏！

當晚7時半，二人乘七人車往銅鑼灣皇室堡撐枱腳晚膳，甫下車，Juno即拖實女友，問到是否已訂婚？他們只笑不語，對於有指他借粉絲之力向Janine求婚，曾趁女友由外地返港時，粉絲在機場高舉「嫁畀我」的紙牌，他只笑笑不置可否，然後在保鏢護駕下搭升降機上樓。原本身穿間條背心裙的Janine，當時已換上粉紅色透視背心、黑色短裙配長襪，身上孭着一個橙色小手袋。逗留3小時後，二人十指緊扣步出，記者再追問是否訂婚？他們依然不回答，但「Kid」一聲笑了出來！問到粉絲支持拍拖、是否不介意同居？二人繼續笑笑口。出到門口，Juno還叫記者：「小心睇路，落雨地下濕呀！」其後登上七人車離開。

Juno先讓女友上車，相當細心！

Janine坐Juno的七人車離開，一臉含羞，認真可愛！

獲讚模範模特兒

事後，記者致電Janine，問到是否已跟Juno訂婚？她笑說：「係咩？哈哈！你哋喺邊度聽番嚟o架？（好事近？）我哋冇傾過呢個問題！（公司畀唔畀你結婚？）冇特別講，工作還工作！（Juno啲粉絲都好支持你！）有人鍾意我當然開心，我都好多謝佢哋！」

Janine所屬的Calcarrie's模特兒公司表示，身價不受戀情影響：「睇番工作性質同客戶關係，不過依家多咗活動搵佢！（拍拖影響工作？）公司唔會反對拍拖，佢係我哋公司嘅模範模特兒，工作態度依然咁好，好多客戶都讚佢！」至於Juno工作亦無怠慢，下半年將歌影雙線出擊。