去年貴為「動漫女神」的周秀娜今年地位不保，與Jessica C.同樣被打入冷宮，被動漫主辦單位封殺！消息一出，大批o靚模乘虛而入，出盡法寶務求吸引一眾動漫迷！擁有「人」字形事業線的DaDa將會在動漫節首日以女魔法師造型現身，以Tube配襯開衩長裙，露臍上陣，性感之餘亦帶點神秘！屆時首次以Cosplay示人的DaDa說：「今次幫間遊戲公司做代言人，佢哋想搵個有人氣又新鮮啲嘅面孔，到時會同觀眾玩遊戲。」早前她守規矩沒有踏足書展，簽名會期間又因病早退，所以會在動漫節舉行簽名會補數：「我之前都好聽話冇去書展踩場，今次會盡量同大會配合，希望佢哋會畀我入啦！」
認與母親關係差
至於身材同樣逼爆的Carol則會穿上開胸旗袍短裙，以春麗Look現身，首日會上大舞台宣傳造勢，更會做幾個活動連踩八小時，她說：「到時都會宣傳寫真，仲會送印咗我個樣嘅滑鼠墊同T-shirt。」對於有傳她與母親關係欠佳，她直認不諱：「佢之前有唔睬過我成個月，屋企人係潮州人，比較保守，依家已經好番，會同媽咪講咗會影啲乜嘢先影。」昨日她出席動漫節記者會時，被問及會否擔心臨時不准她入場，她說：「我覺得佢哋好模糊，好似貿發局唔畀我哋入去，咁都冇辦法同佢哋抗衡。（畀人打爛飯碗？）真係好無奈！完全無所適從，我哋只係一小撮人，都係打份工啫！唔明點解有咁多阻撓？」
Yumi踩場送吻造勢
另一邊廂的Yumi，昨日穿上白色低胸連身裙踩入書展，獲老闆林建名撐場，親自到攤位造勢，老闆力讚她的寫真值一百分，她即獻吻，並自言寫真銷量甚佳：「截至7月25號為止，已經賣咗二萬五千本，打到入三甲好開心！（動漫節有咩新搞作？）到時會着特別啲嘅Cosplay，唔知有冇簽名會，但會喺攤位賣吓T-shirt。（知唔知周秀娜被禁？）唔知喎！今年佢都唔算好性感，唔應該淨係封殺佢一個，唔需要唔畀佢入場囉！」
此外，o靚模組合冬甩（Donut）寸爆表示已獲大會賜封為「動漫女神」，到時在會展「任我行」都冇有怕！她們每日都會殺入動漫節，屆時會以經典卡通人物造型如小雲、美少女戰士及小忌廉等現身。獲大會撐腰的她們，直言今次身份有別：「今次我哋係代表大會去做嘢，責任重大，唔似其他o靚模咁樣唔受控制，我哋係根據大會要求幫動漫節做宣傳。」她們更獲厚待能在大舞台搞簽名會，屆時亦有她們的特別版寫真集，隨書附送DVD，內含《動漫樂園》歌曲及MV，亦有寫真拍攝花絮。