繼書展禁止o靚模舉行簽名會後，後日開鑼的動漫節亦有相應措施「對付」o靚模，昨日舉行的香港動漫節記者會上，有XBox 360工作人員向傳媒發聲明，稱收到大會通知，除周秀娜外，Jessica C.（JC）亦不能現身動漫節攤位宣傳。微軟香港有限公司娛樂及設備事業部總監黃鉅添對此說：「我哋當然希望周秀娜同Jessica C.可以嚟，其實以往都有好多知名人士嚟，好似舊年都搵咗羅凱珊同A.Lin，我哋都覺得界定有啲模糊！」
「知名人士」為由
動漫節行政總裁梁中本以「知名人士」四個字解釋封殺事件：「所有知名人士都唔建議去遊戲攤位宣傳，其實過去十年八年都係咁，冇針對性。（點界定知名人士？）『知名人士』呢個詞係有啲模糊，我哋嘅前提係人流安全問題，因為前幾年出過危險狀況，所以警方建議知名人士唔好去遊戲攤位。（關唔關衣着事？）我個人覺得唔係問題。（擔心周秀娜引起咩混亂？）主要係擔心人流。（點解楊梓瑤可以去？因為佢冇知名度？如果佢聽日有知名度，係咪後日唔可以去？）有咁嘅可能。」
雖然大會聲稱做法沒有針對性，但日本著名女子組合腐男塾、PUFFY、Kalafina與SCANDAL卻獲准出席動漫節活動，莫非她們不屬「知名人士」之列？另外，日本當紅女子組合AKB48，將於下月2日在動漫節舉行記者會，雖然未知會否有成員來港撐場，但已在網上引起哄動。
應XBox 360邀請擔任動漫節開幕嘉賓的Jessica C.則透過經理人表示，還未收到取消通知，雖然她強調會尊重大會及客戶決定，不想違規，但忍不住寸爆說：「去唔到我冇所謂，咪當休息囉！」
娜姐揶揄望「降呢」
至於曾揚言在昨日書展最後一天到攤位謝票的周秀娜，最終因擔心引起混亂而甩底，對於被動漫節封殺，她揶揄說：「我冇唔開心，反而開心喎！冇諗過我竟然升呢做高知名人士，希望傳媒可以將我降呢做『灣仔區翻版樂基兒』，等我呢幾日可以行入灣仔區。」昨晚她欣賞林峯演唱會時再度回應，稱不會向平機會投訴，亦不擔心被抽起代言工作。另外，原定昨晚9時抵港的PUFFY，最終於11時許才在6名工作人員陪同下出閘，沒有Fans接機，而她們亦未有停步受訪。