再做媽咪的栢芝，自上月亮相上海電影節撐恩師周星馳後，已鮮有在港露面，專心在家照顧寶貝仔Lucas及Quintus。由於Quintus年紀尚幼，出世後從未「真人」亮相，直至昨午時分，栢芝終帶他與哥哥出巡，偕拉姑及鬍鬚Kong等到置地廣場High Tea！

栢芝帶同兩名寶貝仔陪拉姑及鬍鬚Kong歎茶，期間拉姑幫忙餵奶，十分熟手。

肥嘟嘟的Quintus只有兩個月大，已着一歲BB衫，身形超班！

歎茶期間，兩婆媳盡顯默契，拉姑睇實Quintus，而栢芝則照顧Lucas。由於Lucas非常好動，栢芝拿出潮物iPad「利誘」他坐定定，而手抱Quintus的拉姑則餵奶兼掃風，栢芝見狀即為兩嫲孫拍照，怎料Lucas為此扭計，栢芝即與他自拍安撫，巧合地，呂良偉與太太楊小娟亦現身歎茶，即上前與栢芝大談湊仔經，並交換電話。

呂良偉夫婦上前與栢芝大談湊仔經，被冷落的Lucas坐唔定，在櫈上擒來擒去。

栢芝只顧拿着iPad左篤右篤，Lucas即整古做怪引她注意。

食飯瞓覺冇扭計

身穿Comme Ca Ism童裝的Quintus，雙手套上手套仔，眼仔睩睩，可愛非常。記者趁他們離開時上前打招呼，栢芝亦禮貌回應，問到Quintus是否很乖巧，她說：「都乖，佢依家有16磅幾。（扭唔扭計？）都唔會，食飯同瞓覺都好乖。（介唔介意畀人影你相？）其實只要企遠啲，唔好整到兩個小朋友就冇問題。」而拉姑則大讚栢芝收身進度理想。

在街頭被女途人追着拍照的Lucas，搞笑地大叫「Stop it！」

Lucas在玩具店中踩單車，不願跟栢芝離開。

其後，一行多人兵分兩路，Quintus由外傭及司機接走，其他人則到鄰近的太子大廈購物，期間有女途人發現Lucas並追上前拍照，Lucas即天真地說：「Stop it！」十分搞笑！至於栢芝則翹着拉姑行街，場面溫馨，問到是否很開心，拉姑說：「梗係開心，我湊BB好熟手o架！」

着1歲BB衫

心情大靚的拉姑到BB服飾店閒逛，而栢芝則帶Lucas到鄰舖看玩具，活潑的Lucas興奮地踩單車，栢芝想帶他找拉姑，但他玩到唔願走，廿四孝的栢芝只好繼續跟到實。至於拉姑睇完BB衫後，到霆鋒與謝賢的至愛牌子Chrome Heart掃貨，其後本想再轉場，但看見Lucas扭計，只好提早收隊，拉姑說：「Quintus雖然得兩個月大，但已經要着1歲BB嘅衫，所以要入貨。」此時有保安發見記者即上前驅趕。

另外，有人以「Lucas謝振軒」之名在微博留言，指Quintus的中文名是「謝振彥」，但已遭謝家否認。