去年憑34D激凸身材上位的Lavina，今年突然扭計不肯推出寫真集，最後被公司雪藏，人氣急跌。近半年冇工開，有傳Lavina窮到要住板間房，而被雪期間更私下接Job，不料此舉觸怒經理人Admond，他更作最後通牒，揚言不會再容許Lavina在公司未批准的情況下出席其他公開活動，否則將會採取法律行動。

行性感激喊阿媽

對此，昨日Lavina在電話中激動反控訴公司刻薄無良：「我都唔清楚自己有幾多份合約，當時自己仲細，所有合約都係英文，又冇Copy，淨係叫我簽簽簽，一時又話鉛筆簽都得。最初以為我八成、佢兩成（指分錢）好合理，點知做完嘢都冇錢收，好似年初同Tommy拍MV到依家都未收錢，真係好唔開心！」

Lavina揚言不想再行性感，她解釋：「我真係接受唔到太性感嘅工作，之前媽咪見我影月曆着咁少，唔開心到喊，我都要顧及屋企人嘅感受。」

另一邊廂，經理人Admond則認為清者自清，承認與Lavina在工作上意見分歧，但否認冇畀錢：「佢同Tommy自己傾，我都冇收錢。公司之前都想同佢出寫真，係佢自己懶同唔聽話，其實公司已經畀好大自由度，佢話出慈善寫真都冇阻止，但唔好太過分！」

Rainbow師妹踩多腳

說到Lavina經濟拮据，去年與她孖公仔拍住搵錢的胡心諾（Rainbow）昨晚出席活動時，坦言很久沒跟對方聯絡，並說：「佢同公司仲有合約，公司唔會咁刻薄，要飲水思源。（會唔會接濟佢？）我會捐去做慈善囉！」另一位師妹曾寶玲（Ar Yu）則說：「公司對我哋好好，其實佢都有機會出寫真，係佢自己錯失機會。（接濟佢？）我會捐三十蚊，佢本寫真三十蚊之嘛！」