混血名模Cara G.不嬲都好注重健康生活，加上要Keep住副Fit爆嘅Model身材，對飲食當然有要求啦！早幾日小小So約佢Shopping，行行吓見Cara G.攞咗包自己煮定嘅蔬菜出嚟食，佢同我講原來啱啱開始咗個纖體餐單，搞到小小So都心郁郁想試！
Cara G.：我每餐都只可以食蔬菜同水果，一日三餐，種類同分量不限，但係每餐都要喺半個鐘之內食完。
小小So：三餐有冇指定時間？
Cara G.：有o架！我喺十點至十點半食早餐，三點至三點半食午餐，七點至七點半食晚餐。而且蔬菜只可以灼熟，唔可以落任何調味料同油！
小小So：呢個方法真係有效？
Cara G.：嗯！我之前試咗一個月，瘦咗7kg，一啲水腫都冇！不過我今次諗住食兩星期就夠，日日都只得蔬菜同水果食好悶！
小小So：蔬菜同水果都有好多選擇喎！
Cara G.：係㗎！但係當你冇得食某啲嘢嗰陣，你就特別想食！平時都唔覺，但係冇嘅時候就硬係成日諗住，要好堅持同好忍得口！